ԱՆՀՐԱԺԵՇՏ Է ՄԻԱՍՆԱԿԱՆ ՋԱՆՔԵՐՈՎ ՀԵՌԱՑՆԵԼ ԻՇԽՈՂ ԿԱՊԻՏՈւԼՅԱՑԻՈՆ ՎԱՐՉԱԽՄԲԻՆ
Բաքվի բռնապետ Ալիևը հունվարի 7-ին արած իր հայտարարություններով փաստացի հրաժարվեց Հայաստանի հետ խաղաղության գործընթացից, Հայաստանն ու հայ ժողովրդին անվանեց ֆաշիստ և, հերթական անգամ ոտնահարելով միջազգային իրավունքի հիմնարար սկզբունքները, ուժի գործադրման սպառնալիքով մի շարք անընդունելի պահանջներ ներկայացրեց Հայաստանին․
- Հայաստանի Հանրապետության ինքնիշխան տարածքները հանձնել Ադրբեջանին` Նախիջևանի հետ ցամաքային կապ ապահովելու համար,
• վերացնել Հայաստանում գործող ազգային ուժերը և իրականացնել հայ ժողովրդի ազգային ինքնության չեղարկմանն ուղղված արմատական գործողություններ,
• կազմաքանդել ՀՀ զինված ուժերի առկա համակարգը և զինաթափել բանակը,
• Հայաստանի Հանրապետության անունից պաշտոնապես ճանաչել «Արևմտյան Ադրբեջանի համայնք» արհեստածին կազմավորումը և բանակցել դրա «ներկայացուցիչների» հետ։
Այս պահանջների կատարումը հավասարազոր է փուլային ճանապարհով հայոց պետականության կազմաքանդմանը և հայ ժողովրդի նոր ցեղասպանությանը։ Ցավոք, երկրում գործող կապիտուլյացիոն վարչախմբի պարագլուխ Նիկոլ Փաշինյանն իր արձագանքներում Բաքվի բռնապետին տվեց ակնհայտորեն համաձայնեցված հետևյալ ուղերձները․
- ընդունելի համարեց Հայաստանին ֆաշիզմի մեջ մեղադրելը՝ պատրաստակամություն հայտնելով Բաքվի հետ քննարկելու Հայաստանի «դենացիֆիկացիային» տանող միջոցառումները,
• հղում անելով սահմանազատման 2024 թվականի «դրական փորձին»՝ Բաքվին հրավիրեց ներկայացնելու տարածքային նոր պահանջներ և հանձն առավ բավարարելու դրանք,
• հայտարարելով, որ Հայաստանի Հանրապետությունից օկուպացված ավելի քան 200 քառ․ կմ տարածքները ռազմական ճանապարհով ետ բերելու խնդիր չի դնում՝ ուղերձ հղեց Բաքվին գրավելու նոր տարածքներ։
Հայաստանի գործող վարչախմբի պետականակործան այս քաղաքականությունը հայ ժողովրդի համար հղի է աղետալի նոր հետևանքներով։
«ՀայաՔվե» ազգային քաղաքացիական միավորումը, հետևողական պայքար մղելով վարչախմբի ազգակործան քաղաքականության դեմ, անհրաժեշտ է համարում այս փուլում ազգային բոլոր ուժերի և անհատների միավորումը հետևյալ օրակարգի շուրջ․
• միասնական ջանքերով հեռացնել Հայաստանում գործող կապիտուլյացիոն վարչախումբը և ձևավորել նոր, ներկայացուցչական և կոմպետենտ ազգային իշխանություն,
• սկսել ակտիվ երկխոսություն համաշխարհային ու տարածաշրջանային ուժային կենտրոնների, ինչպես նաև Սփյուռքի հիմնական կառույցների հետ՝ ամրապնդելու անվտանգության տարածաշրջանային համակարգը և բացառելու ռազմական գործողությունների վերսկսումը,
• վերադարձնել Արցախի հարցը հայ-ադրբեջանական բանակցությունների օրակարգ և հետևողականորեն հետամուտ լինել Արցախի վերադարձի և ինքնորոշման իրավունքի իրացմանը․
• երկրի պաշտպանունակությունը բարձրացնելու նպատակով անհապաղ ծավալել աշխատանքներ բազմաշերտ պաշտպանական բնագծեր կառուցելու, փորձառու զինծառայողներին Զինված ուժերում ներգրավելու, ակտիվ պահեստազոր ձևավորելու, քաղաքացիական պաշտպանության համակարգեր ներդնելու ուղղություններով։
Կարդացեք նաև
«ՀայաՔվե» ազգային քաղաքացիական միավորման խորհուրդ
Նման ագրեսիվ հայտարարություններ անելով, ալիևը ստուգում է ինչպես մեր իշխանությունների խեղճության և անկարողության մակարդակը, այնպես էլ հայ հասարակության արժանապատվությունը, հակադարձելու կարողությունը, դիմադրողականությունը և այլ հատկանիշներ։
Մեր մեջ ասած, կյանքը ցույց է տալիս, որ այս պահին մեր ազգի մտավոր կարողություններ ունեցող մարդկանց մեջ արժանապատվությունն ու հայրենասիրությունն այնքան էլ չեն եռում, որպեսզի թշնամու հոխորտանքները և քարոզչական կրակոցները մեզ ակտիվ վիճակի բերեին ու արթնացնեին մեր այն ուժեղ հատկանիշները, որոնցից տասնյակ տարիներով վախեցել են հայր և որդի ալիևները։
Հուսադրող է, որ գոնե «ՀայաՔվե» միավորումը ազգային բոլոր ուժերի ու անհատների միավորման կոչ է անում և քայլեր է առաջարկում մեր առաջիկա անելիքների, այդ թվում նաև երկրի պաշտպանությունը բարվոք վիճակի բերելու ուղղությամբ։