Երեւան քաղաքի ընդհանուր իրավասության դատարանի «Կենտրոն» նստավայրում դատավոր Կարեն Ֆարխոյանի նախագահությամբ շարունակվեց ՀՀ ԱԺ «Հայաստան» խմբակցության պատգամավոր Լեւոն Քոչարյանի եւ Սերգեյ Ասատուրովի գործով դատական նիստը: Նրանց մեղադրանք է առաջադրված անհնազանդության ցույցերի ժամանակ ոստիկանության ծառայողների օրինական գործողությանը ենթադրաբար միջամտելու եւ բռնություն կիրառելու համար:
Այսօրվա նիստում հարցաքննվում էր տուժող ճանաչված ոստիկանության աշխատակից Հրաչ Խաչատրյանը: Գործով մեղադրյալ Լեւոն Քոչարյանը եւ պաշտպաններ Ալեքսանդր Կոչուբաեւը, Արամ Վարդեւանյանն ու Էրիկ Ալեքսանյանը մայրաքաղաքի Ամիրյան փողոցում տեղի ունեցած իրադարձությունների, Լեւոն Քոչարյանին ոստիկանության «Շենգավիթ» բաժանմունք բերման ենթարկելու մանրամասները ճշտելու նպատակով հարցեր ուղղեցին տուժողին, որոնց մի զգալի մասին նա չկարողացավ հանգամանալի պատասխաններ տալ՝ մանրամասները չհիշելու պատճառաբանությամբ: Այս առումով, փաստաբանները արձանագրեցին, որ տուժող ոստիկանը իրենց հետաքրքրող հարցերին պատասխանում է երկակի ստանդարտներով: Այսինքն, այն դրվագները, որոնք իր կարծիքով համեմատաբար նպաստավոր են, նկարագրում է առանց դժվարանալու, իսկ դեպքերը, որտեղ իր կատարած գործողությունները խոցելի են, պատճառաբանում է, թե չի հիշում:
Նիստը հետաձգվեց: Հաջորդ նիստը կկայանա 2025 թվականի հունվարի 24-ին, ժամը 16:00-ին, որի ընթացքում մեղադրվող կողմը կշարունակի հարցեր տալ տուժած կողմին:
Կարդացեք նաև
Աշոտ ՀԱԿՈԲՅԱՆ
