ՀՀ ԱԺ «Հայաստան» դաշինքից ՀՅԴ պատգամավոր Գառնիկ Դանիելյանը «Հայելի» ակումբում հայ ժողովրդին շնորհավորեց Սուրբ Ծնունդի եւ Ամանորի առիթով, որից հետո անդրադարձավ ուղիղ եթերում հնացած ուտելիքի մնացորդներով ձվածեղ պատրաստելու հայտնի արարողությանը:
«Այդ ամենը պատահական չի արվում: Դա անարգանք է հարյուր հազարավոր մեր հավատացյալ ժողովրդի նկատմամբ, որոնք պետք է լինեն եկեղեցում, մասնակցեն Սուրբ Պատարագի: Դե, սրանք վաղուց մոռացել են եկեղեցին: Իսկ մեկը կար, որ ասում էր, թե Հիսուս Քրիստոսին տեսնում է Փաշինյանի կերպարով, տեսանք ինչ եղավ նրա ճակատագիրը: Ուզում եմ նմաններիդ ասել, որ Նիկոլ Փաշինյանը հերթով բոլորիդ օգտագործելու է ու դուրս է շպրտելու: Ու դրանով էլ չի բավարարվելու, մտնելու է ընտանիքներ, անձնական դաշտ: Ով ուզում է լինի իրենց թիմից. այսօր՝ քեֆ-ուրախություն իրար հետ, խրախճանք, վաղը՝ համոզված եղեք, որ յուրաքանչյուրիդ թեւից կարող է բռնել, շպրտել եւ, այսպես ասած, սարքել փալաս: Ցոփ ու շվայտ կյանքը, որ դուք այսօր վայելում եք, վաղը պատասխան եք տալու:
Չեք տեսնո՞ւմ, թե մեր շուրջն ինչ է կատարվում: Ձվածեղ են անում, հեծանիվ են քշում, հաճույքներ, խրախճանքներ, հրավառություն: Միլիոնավոր դրամներ են վատնում այն մարդիկ, որոնք ժամանակին տրանսպորտով էին երթեւեկում, ապառիկով փոշեկուլ եւ հեռուստացույց էին առնում, այսօր մեկ օրվա մեջ միլիոնավոր դրամների ծախսեր են անում: Որտեղի՞ց այդ գումարները: Էս ո՞ւր հասաք: Բա մեր հայրենակիցները դրանցից պահանջելու բան չունե՞ն: Ձեր պարտականությունները չեք կատարում քիչ չի, թուրք-ադրբեջանական շահերն եք սպասարկում, հիմա էլ տեսնում ենք՝ տարբեր տենդեռների մեջ եք:
Կարդացեք նաև
Այս պաշտոնանկություններն էլ, որ կան, նրա համար չէ, որ ինչ-որ մեկը վատ է աշխատել: Դա նրա համար է, որ այդ մարդիկ հարստանում են ու համապատասխան տեղերն էլ քիչ փող են տալիս: Խոսում են ոսկու միլիարդավոր դոլարների շրջանառության մասին, որ գալիս եւ գնում է տարբեր երկրներ:
Պետք է խոսել նաեւ վառելիքի մասին: Վերջերս հարցում էի արել: Պարսկաստանից ավիաբենզինի, որը չի հարկվում, անվան տակ հազարավոր տոննաներ են մտնում Հայաստան: Դրանով երեւի տարածաշրջանի բոլոր օդանավերը կլիցքավորվեին: Պարզ է, չէ՞, որ այս ամենը զարտուղի ճանապարհներով, հովանավորչությամբ է տեղի ունենում, միլիարդավոր դոլարների շահույթ ու եկամուտ է բերում իշխող թիմին եւ իր շրջանակներին: Սրա պատասխանն ո՞վ պիտի տա:
Սիրելի հայրենակիցներ, տեսնում եք, չէ՞, սրանց օր-օրի հղփանալը, հարստանալը: Սրանց խնդիրը ոչ թե Արցախն էր, հայրենիքն էր, երկիրն էր, անվտանգային հարցերն էին, ներքին բախումները տեղի ունենում են զուտ ֆինանսական կարողությունների վերաբաշխման համար: Մեկն ավելի քիչ է հարստացել, մյուսն՝ ավելի շատ: Ու դրա համար են այս փոփոխությունները տեղի ունենում», – ասաց պատգամավորը:
Աշոտ ՀԱԿՈԲՅԱՆ
