ՀՀ մարդու իրավունքների առաջին պաշտպան Լարիսա Ալավերդյանը, «Հայելի» ակումբում հայ ժողովրդին շնորհավորելով Ամանորի եւ Սուրբ Ծննդյան լուսափառ տոնի առիթով, ասաց. «Ես համոզված եմ, որ մեր փրկության ճանապարհը դարձի ճանապարհն է: Ցանկանում եմ, որ մենք լինենք ազնիվ նախ ու առաջ ինքներս մեզ հետ: Համոզված եմ, որ սա է մեզ բերելու լուսավոր ճանապարհ: Այդ լուսավոր ճանապարհով ու հզորացած Հայաստանով է անցնում Արցախ վերադառնալու ճանապարհը: Բոլորին եմ դիմում, նաեւ այն խմբին, որը գրագիտությունից, պատմությունից շատ հեռու է, նաեւ իրենց քաղաքագետ համարող մարդկանց:
Այն խումբը, որը եկել է իշխանության, բացարձակապես որեւէ աղերս չունի հայ ժողովրդի ոչ պատմության, ոչ իրականության եւ ոչ էլ ապագայի հետ: Բայց որպես այդքան մեղքեր գործած էակների, մեկ է. ես բոլորիդ ցանկանում եմ երկար կյանք, որ դուք տեսնեք, թե իրական կյանքը ինչպիսինն է: Եվ խնդրում եմ, մի ձեւացրեք ձեզանից ոչ աշխարհաքաղաքագետ, ոչ պատմաբան, ոչ էլ աստվածաբան: Դա ոչ մի բանով չի վնասելու աստվածաբանությանը, պատմությանը, իրականությանը, բայց ավելացնում է ձեր մեղքերը:
Ես կցանկանայի, որ մենք իրապես հասկանանք հետեւյալը: Այսօր միջազգային հարթակների վրա չի ներկայացված իրական Հայաստանը: Իրենց խոսքերն եմ ասում: Այն, ինչ իրենք ներկայացնում են, դա Ադրբեջանի ղեկավարության կողմից հնարածին է: Մենք չունենք այսօր իշխանություն, որը միջազգային հարթակներում կներկայացներ հայ ժողովրդի, հայության իրավունքները, նաեւ արժանապատվությունը: Դրա համար մենք ունենք խնդիր: Եվ եթե այդ խնդիրը չենք լուծել մինչեւ այսօր, ուրեմն պիտի լուծենք այսօր եւ վաղը: Ինչքան շուտ, այնքան լավ»:
Խոսելով Տիրան Խաչատրյանի ձերբակալության մասին՝ տիկին Ալավերդյանն ասաց. «Ես տամ դրա բանաձեւը: Ուղղակի, ում չի կարողանում ձերբակալել Ալիեւը, ձերբակալում է Նիկոլը: Դա շատ պարզ բան է եւ դրա համար ես հեռուներ չեմ գնում: Էլի հիշեցնեմ, որ առաջինը Արցախի նախագահին ձերբակալել է հենց այս իշխանության պարագլուխը: Նա է ցույց տվել ճանապարհը: Հանկարծ առաջնությունը չխլեք Նիկոլ Փաշինյանից: Ինքն է բոլոր նախաձեռնությունների հեղինակը, ինքն է առաջին ձայնը, ինքն է ազդանշանը տալիս, որ կարող եք:
Կարդացեք նաև
Ի՞նչ էր Տիրան Խաչատրյանի ձերբակալությունը: Դա արձագանք էր Ադրբեջանի այն հայտարարությանը, թե կան գործեր, որոնց մեջ… Դա պատասխանն է: 44-օրյայում, ով չենթարկվեց եւ առաջինը չհանձնվեց, ձերբակալում է: Ի զարմանս բազմաթիվ ռազմական փորձագետների, Արցախը կարողացավ 44 օր դիմադրել: Սիրելիներս, հիշենք մարտիրոսացած մեր հերոս տղաներին: Իսկ նրանք, ովքեր չեն հանձնվել առաջին օրվանից, նրանց ձերբակալում է:
Սիրելի եւ ատելի, կամ գոյություն ունեցող իշխանություն. այստեղ-այնտեղ մի ման եկեք դավաճանների եւ դավադրություն: Դուք չգիտե՞ք, թե ով է Արցախի բանակը զինաթափելու հրամանը տվել: Կարո՞ղ է միայն ես եմ իմանում, որ դա գլխավոր հրամանատար հանդիսացող ՀՀ կառավարության վարչապետի պաշտոնը զբաղեցնող անձն է: Սիրելի ՔՊ պատգամավորներ, ձեր երիտասարդական ավյունը պահեք: Կյանքը դեռ առջեւում է, դեռ պետք է զղջաք այս ամենի համար, եւ հուսամ, որ կապաշխարեք ու թողություն կստանաք: Բայց դուք օրեցօր խրվում եք մարդու աններելի մեղքերի մեջ»,- ասաց Լարիսա Ալավերդյանը:
Աշոտ ՀԱԿՈԲՅԱՆ
