Վավերագրող ռեժիսոր Հովհաննես Իշխանյանը 2025 թվականին առաջին անգամ հյուրընկալվելով «Հայելի» ակումբին՝ ասաց. «2024-ը եւս մի բարդ ու ներվային տարի էր: Մենք Տավուշից տարածքներ, լավ դիրքեր կորցրեցինք, ներվեր կորցրեցինք, նաեւ չկարողացանք հաջողության հասնել «Տավուշը՝ հանուն Հայրենիքի» շարժումով: Ընդդիմության մեջ էլ կրկին պառակտումներ, անհասկացություններ եւ տարաձայնություններ եղան:
Հիմա նորից մտնում ենք մի տարի, երբ Թուրքիան Սիրիայում առաջխաղացում ու հաջողություն ունեցավ, երբ Իրանն ավելի թուլացած է ու Սյունիքը ավելի շատ է վտանգված: Այս տարի ամենայն հավանականությամբ կրկին լինելու է որոշակի կորուստների տարի, որովհետեւ մենք գիտենք՝ դավաճանն է իշխանության, դավաճանն է նոր տարվա ուղերձը հղել, դավաճանն է իր ցանկություններն ի կատար ածում:
Սակայն դա չի նշանակում, որ այս տարի մենք հանձնված ենք լինելու եւ չենք պայքարելու մեր իրավունքների եւ մեր ազատության համար: Բնականաբար, պայքարելու ենք: Նախորդ տարվա փորձը մեզ իմունիտետ է հաղորդել, գիտելիք է փոխանցել: Ամենայն հավանականությամբ, այս տարի նույնպես Նիկոլ Փաշինյանենք կմնան իշխանության, որովհետեւ Թուրքիան ուժեղանում է: Իսկ եթե Թուրքիան ուժեղանում է, նշանակում է՝ Նիկոլ Փաշինյանի դե ֆակտո իշխանությունը, որ ոչ իմն է, ոչ՝ ձերը, այլ նրանք պարզապես այն բռնի զավթելով են Հայաստանում տիրապետում իշխանության, ամրապնդվում է: Բայց մենք պայքարելու ենք, բայց բնականաբար պետք է այդ պայքարում ինքներս կատարելագործվենք», – ասաց նա:
Անդրադառնալով գեներալ-լեյտենանտ Տիրան Խաչատրյանի ձերբակալությանը եւ երկու ամսով կալանավորելուն՝ Հովհաննես Իշխանյանն ասաց. «Տիրան Խաչատրյանը մեր բանակի բարձրաստիճան սպաներից է, որն ունի հստակ դիրքորոշում: Նրա դիրքորոշումը ի նպաստ բանակի է, ի նպաստ Հայաստանի տարածքային ամբողջականության եւ Արցախի պաշտպանության: Բնականաբար, նա պետք է դառնար Նիկոլ Փաշինյանի թիրախը եւ առաջին անգամ չէ, որ դառնում է: Մյուս կողմից, նա բարձրակարգ, պրոֆեսիոնալ գեներալ է: Ինչպես գիտենք, Նիկոլ Փաշինյանը նրան Ազգային հերոսի կոչում էր տվել, բայց Տիրան Խաչատրյանը չէր վերցրել այդ պարգեւը: Կարող ենք ենթադրել, թե ինչու չէր վերցրել. նորմալ մարդը Նիկոլ Փաշինյանից չէր վերցնի մեդալ: Հիմա փորձենք հասկանալ, թե Նիկոլ Փաշինյանը ինչու է նրան բանտարկում:
Կարդացեք նաև
Երբ որ Նիկոլ Փաշինյանը որեւէ բան հանձնում է, նրան անհրաժեշտ է, որ նախորդ հանցանքների մեղքի բաժինը գցի բանակի վրա: Դրա երկու պատճառ կա: Մի կողմից, ինքը հանրության մեջ է ստեղծում այն պատկերացումը, որ ես մաքուր եմ, բանակն է մեղավոր ձեր կորուստների, ձեր աղետների, ձեր դժբախտությունների, ձեր լաց ու կոցի, ձեր տունը, պապենական հողը կորցնելու մեջ, իսկ ես Արցախը պարզապես ճանաչել եմ Ադրբեջանի կազմում: Մյուս կողմից, նա բանակին է ուղերձ հղում, թե տեսեք. ես կարող եմ մարդուն Ազգային հերոսի կոչում տալ եւ տանել բանտարկել: Ու նույնը կարող եմ ձեզ հետ անել:
Նվաստացնում է, թե հանկարծ չշփոթվեք, դուք մեդալ կարող եք ստանալ միայն այն դեպքում, եթե Հայաստանից տարածք հանձնեք: Ինչպես եղավ Տավուշում: Հիշո՞ւմ եք, երբ մեր սեփական տարածքները հանձնեց Ադրբեջանին, նա պարգեւատրեց այն բարձրաստիճան սպաներին, որոնք պատասխանատու էին այդ տարածքները չհանձնելու համար:
Ես շուտափույթ ազատում եմ մաղթում Տիրան Խաչատրյանին, Հայաստանի ու Ադրբեջանի բանտերում գտնվող մեր գերիներին, թեեւ մենք բոլորս էլ ինչ-որ առումով գերի ենք այս լակոտակրատական ՔՊԿ-ի ձեռքին»:
Աշոտ ՀԱԿՈԲՅԱՆ
