2024 թվականի նոյեմբերի 5-ին կայացած ընդհանուր ընտրությունների հիմքով այսօր մեկնարկում են Միացյալ Նահանգների 119-րդ Կոնգրեսի երկամյա լիազորությունները։
Նորընտիր կոնգրեսականները երդվել են հավատարիմ մնալ ԱՄՆ Սահմանադրությանը եւ անձնվիրաբար իրականացնել իրենց լիազորությունները։
Կկայանա խոսնակի ընտրություն
Ներկայացուցիչների տունն այսօր նաեւ խոսնակ կընտրի։ Փոքրամասնություն կազմող դեմոկրատներն առաջադրել են Հաքիմ Ջեֆրիզի թեկնածությունը։ Հանրապետական մեծամասնության թեկնածուն 118-րդ Տան խոսնակ Մայք Ջոնսոնն է, որի թեկնածությանը աջակցություն է հայտնել նորընտիր նախագահ Դոնալդ Թրամփը։
Կարդացեք նաև
ՀԻՄԱ․ խոսնակի ընտրությունը
Հանրապետականները մեծամասնություն են
Կոնգրեսն ԱՄՆ երկպալատ օրենսդիր մարմինն է։ Վերին պալատը Սենատն է, ստորինը՝ Ներկայացուցիչների տունը։
Թե՛ վերին, թե՛ ստորին պալատներում մեծամասնություն կկազմեն հանրապետականները, այսինքն առաջիկա առնվազն երկու տարիներին Վաշինգտոնում կգերակայի հանրապետական ներկայությունը, քանի որ պաշտոնը ստանձնել պատրաստվող նորընտիր նախագահ Դոնալդ Թրամփը եւս հանրապետական կուսակցությունից է։
435 ներկայացուցիչ + 100 սենատոր = 535 կոնգրեսական
Կոնգրեսը բաղկացած է 535 անդամից՝ 435 ներկայացուցիչ եւ 100 անդամ։
Ներկայացուցիչները պաշտոնավարում են 2 տարի ժամկետով, իսկ սենատորները՝ 6: Ներկայացուցիչների տան բոլոր 435 անդամների եւ 100 սենատորների ⅓-ի ընտրությունն անցկացվում է զույգ տարիներին։
Ներկայացուցիչների տանը ներկայացվածությունը համարժեք է նահանգների բնակչության թվին։ Ամենաբնակեցված նահանգ Կալիֆոռնիային, օրինակ, 54 ներկայացուցիչ է հասնում: Ամենանվազ բնակչությամբ նահանգներ Ալյասկային, Վայոմինգին, Մոնտանային, Հյուսիսային Դակոտային, Հարավային Դակոտային, Վերմոնտին եւ Դելավերին բաժին է հասնում է միայն 1 ներկայացուցիչ։
Մինչդեռ, Սենատում նահանգները ներկայացված են հավասարաբար՝ յուրաքանչյուր նահանգից 2 սենատոր։
Ծանոթ դեմքեր ղեկավար պաշտոններում
Հանրապետականները Ներկայացուցիչների տան իրենց խմբակցության ղեկավար են նշանակել Ստիվ Սկալիսին, որն այդ պաշտոնում է 2023-ի հունվարից։ Դեմոկրատական փոքրամասնությունը շարունակելու է առաջնորդել Հաքիմ Ջեֆրիզը։
Սենատի հանրապետական մեծամասնության ղեկավարի պաշտոնն ստանձնել է Ջոն Թունը, իսկ դեմոկրատական խմբակցությունը կշարունակի պաշտոնավարել Չաք Շումերը, բայց արդեն որպես փոքրամասնության ղեկավար։
Սենատի նախագահը փոխնախագահն է
Սահմանադրության համաձայն՝ Սենատի նախագահը ի պաշտոնե ԱՄՆ փոխնախագահն է՝ Քամալա Հարիսը։ Թեեւ փոխնախագահը քվեարկում է միայն այն դեպքում, երբ կողմ եւ դեմ քվեարկած սենատորների թիվը հավասար է, փոխնախագահն է նախագահում նիստերը։
Քամալա Հարիսը Սենատի նախագահի պաշտոնը կզբաղեցնի մինչեւ հունվարի 20-ը։ Այդ օրն ավարտվում են Բայդեն-Հարիս վարչակազմի լիազորությունները։ Հունվարի 20-ից Սենատում կնախագահի նորընտիր փոխնախագահ Ջեյ Դի Վենսը։
Սենատի փոխարինող նախագահ է նշանակվել հանրապետական Չաք Գրասլին։
ՀԻՄԱ․ նորընտիր Սենատի առաջին նիստը
Արսեն ԱՅՎԱԶՅԱՆ
