«Ամերիկայի ձայն». Վրաստանի ոստիկանությունը գրեթե ամեն օր ջրցան մեքենաներ և արցունքաբեր գազ է կիրառել ցուցարարներին ցրելու համար, որոնցից ոմանք հրավառություն են նետել ոստիկանների ուղղությամբ և բարիկադներ տեղադրել մայրաքաղաքի կենտրոնական պողոտայում:
Վրաստանի ոստիկանությունը գրեթե ամեն օր ջրցան մեքենաներ և արցունքաբեր գազ է կիրառել ցուցարարներին ցրելու համար, որոնցից ոմանք հրավառություն են նետել ոստիկանների ուղղությամբ և բարիկադներ տեղադրել մայրաքաղաքի կենտրոնական պողոտայում:
Նախարարներն ընդգծել են երկրում ժողովրդավարական շարժմանն աջակցությունը և հայտարարել, որ կիրականացնեն Վրաստանի դիվանագիտական և ծառայողական անձնագրեր ունեցողների համար առանց վիզայի ռեժիմը դադարեցնելու ԵՄ որոշումը։
Գերմանիայի, Ֆրանսիայի և Լեհաստանի արտաքին գործերի նախարարները երեքշաբթի օրը մտահոգություն են հայտնել Վրաստանում «քաղաքական ճգնաժամի» կապակցությամբ՝ նախկին ֆուտբոլիստ Միխեիլ Կավելաշվիլիի պաշտոնապես երկրի նախագահի պաշտոնը ստանձնելուց երկու օր անց։ Երդմնակալությունը ամրապնդեց իշխող «Վրացական երազանք» կուսակցությանը, ինչը ընդդիմությունն անվանում է հարված երկրի Եվրամիության նկրտումներին և հաղթանակ Ռուսաստանի իշխանությունների համար:
Կարդացեք նաև
«Մենք խստորեն դատապարտում ենք խաղաղ ցուցարարների, ԶԼՄ-ների և ընդդիմության առաջնորդների նկատմամբ անցած շաբաթվա բռնությունները և հիշեցնում ենք Վրաստանի իշխանությունների հանձնառությունը՝ հարգելու մարդու իրավունքները և պաշտպանելու հիմնարար ազատությունները, ներառյալ հավաքների և լրատվամիջոցների ազատությունը»,- գրված է երեք նախարարների համատեղ հայտարարության մեջ։
Ի պատասխան իշխող «Վրացական երազանք» կուսակցության Ռուսաստանի հանդեպ բարյացակամ կուրսի՝ երեք եվրոպական երկրները հայտարարել են, որ «կկատարեն ԵՄ որոշումը՝ դադարեցնելու վրացական դիվանագիտական և ծառայողական անձնագրեր ունեցողների համար առանց վիզայի ռեժիմը և կքննարկեն լրացուցիչ միջոցներ ԵՄ և ազգային մակարդակներում»:
Նրանք նաև ընդգծել են, որ «Վրացական երազանքի» ռեպրեսիաների և ժողովրդավարական հետընթացի քաղաքականությունը հանգեցրել է եվրոպական և ազգային մակարդակներում մեր հարաբերությունների անկմանը և վրացական իշխանությունների հետ մեր օգնության և համագործակցության կրճատմանը»:
Անցյալ ամիս «Վրացական երազանք»-ի՝ ԵՄ-ին իր երկրի անդամակցության շուրջ բանակցությունները դադարեցնելու որոշումը բորբոքեց ընդդիմության զայրույթը և բողոքի ցույցեր առաջացրեց:
«Մենք վերահաստատում ենք մեր վճռականությունը՝ աջակցելու վրաց ժողովրդի ժողովրդավարական և եվրոպական նկրտումներին», – ընդգծել են Գերմանիան, Ֆրանսիան և Լեհաստանը իրենց համատեղ հայտարարության մեջ։
Հինգերորդ նախագահ Սալոմե Զուրաբիշվիլին, ընդդիմությունը և երկրի միջազգային գործընկերների զգալի մասը չեն ճանաչում Կավելաշվիլիի ընտրությունը։ Զուրաբիշվիլին Միխեիլ Կավելաշվիլիի պաշտոնի ստանձնումը «խեղկատակություն» է անվանել։
Հազարավոր ցուցարարներ շաբաթներ շարունակ ամեն գիշեր հավաքվում են խորհրդարանի մոտ այն բանից հետո, երբ կառավարությունը հայտարարեց, որ նոյեմբերի 28-ին կդադարեցնի ԵՄ անդամակցության բանակցությունները:
Ոստիկանությունը գրեթե ամեն օր ջրցան մեքենաներ և արցունքաբեր գազ է կիրառել ցուցարարներին ցրելու համար, որոնցից ոմանք հրավառություն են նետել ոստիկանների ուղղությամբ և բարիկադներ տեղադրել մայրաքաղաքի կենտրոնական պողոտայում: Հարյուրավոր մարդիկ բերման են ենթարկվել, իսկ ավելի քան 100-ը դիմել են բժշկական օգնության իրենց վնասվածքների համար:
Ոստիկանության կողմից ծեծի ենթարկված մի քանի լրագրողներ իշխանություններին մեղադրում են քրեածին տարրերին օգտագործելու մեջ՝ մարդկանց հակակառավարական ցույցերից հեռու պահելու համար, ինչը հերքում է «Վրացական երազանք» կուսակցությունը: Այս բռնաճնշումները արժանացան ԱՄՆ և ԵՄ պաշտոնյաների խիստ դատապարտմանը:
