«Լուսավոր Հայաստան» կուսակցության նախագահ Էդմոն Մարուքյանի տելեգրամյան գրառումը
Այս օրերին լայնորեն քննարկվում և քննադատվում են գույքահարկի նոր դրույքաչափերը: Մեր հայրենակիցներն իրենց զարհուրանքն են արտահայտում այն ահռելի գումարների կապակցությամբ, որոնք պետք է վճարեն 2025 թվականից սկսած, իսկ 2026-ից դրանք էլ ավելի կբարձրանան: Հիշեցնեմ, որ արդեն հեռավոր 2019 թվականին, երբ Ազգային ժողովում քննարկվում էր այս օրենքը, դրան ընդդիմացել էր միայն «Լուսավոր Հայաստան» խմբակցությունը:
Հարցնում էինք՝ ինչպե՞ս կարելի է բարձրացնել գույքահարկը, երբ քաղաքացիների եկամուտները չեն աճում: Նորաթուխ իշխանավորները պատասխանում էին, որ եթե Կենտրոնում բնակվող մարդը եկամուտ չունի, կարող է վաճառել իր տունը և տեղափոխվել Նոր-Նորք: Փաստացի, օրենքի ուժով առաջարկում էին ստիպել քաղաքացիներին հրաժարվել իրենց միջավայրից, հայրական օջախից և ժառանգությունից:
Մենք առաջարկում էինք այլընտրանք. ժառանգված գույքի համար պահպանել գործող հարկային դրույքաչափերը, իսկ գույքի վաճառքի դեպքում միայն գնորդին՝ նոր սեփականատիրոջը, պարտավորեցնել վճարել բարձր դրույքաչափ: Այս տարբերակով թոշակառուն կամ նվազագույն աշխատավարձ ստացող քաղաքացին, որը Փոքր Կենտրոնում բնակարան է ժառանգել, չէր կանգնի փաստի առաջ և ստիպված չէր լինի վաճառել իր տունը: Միևնույն ժամանակ, գույքահարկի բարձր դրույքաչափով վճարումը կդառնար յուրաքանչյուր գնորդի անձնական որոշումը:
Կարդացեք նաև
2019-ին «Լուսավոր Հայաստան» խմբակցությունը բարձրաձայնում էր այս խնդիրը՝ փորձելով հասարակության ուշադրությունը սևեռել դրա վրա, բայց մեր պայքարը պիտակավորվում էր, իսկ շատերը, դա տեսնելով, նախընտրում էին լռել՝ ընդունելով «խաղի կանոնները»:
Հայաստանը վարակված էր անձի պաշտամունքով, և մեր ձայնը խլացվում էր «մի՛ խանգարեք», «թողե՛ք աշխատեն» կոչերով:
Մինչդեռ մեր ջանքերը, որոնք ուղղված էին քաղաքացիների շահերի պաշտպանությանը, դիտավորյալ վարկաբեկվում էին: Ու հիմա ևս մեկ անգամ հաստատվում է, որ մենք երբեք լավը երևալու նպատակ չենք հետապնդել, չենք պայքարել քաղաքական վարկանիշի համար և այդ պահին էլ դեմ քվեարկելով, հավատարիմ ենք մնացել մեր սկզբունքներին ու պաշտպանել ենք ժողովրդի շահերը:
