Ներգաղթի հարցը ԱՄՆ նախկին նախագահ Դոնալդ Թրամփի նախընտրական ծրագրի կարևոր կետերից էր, և ամերիկյան գալիք վարչակազմը, ինչպես հայտնի է, նախատեսում է խիստ քաղաքականություն վարել այդ հարցում։ «Ամերիկայի ձայնը» փորձել է հասկանալ, թե գործնականում այն ինչ կարող է նշանակել:
Իր նախընտրական արշավի ժամանակ Դոնալդ Թրամփը խոստանում էր խիստ միջոցներ ձեռնարկել ապօրինի ներգաղթյալների դեմ՝ այդ թվում լայնորեն կիրառել կալանավորումները և արտաքսել անօրինական միգրանտներին:
«Պատրաստվում ենք իրականացնել Ամերիկայի պատմության մեջ ամենամեծ արտաքսումը: Այլ ելք չունենք։ Չունենք այլ ելք։ Չունենք, քանի որ նման բանն անտանելի է որևէ երկրի համար»,- ասում է ԱՄՆ նորընտիր նախագահ Դոնալդ Թրամփը:
Ըստ տեղեկությունների՝ ապօրինի ներգաղթի դեմ պայքարի հարցում Թրամփի ծրագրերը ներառում է կալանավայրերի ընդլայնում և վերադարձ «Մնա Մեքսիկայում» քաղաքականությանը, որը պահանջում է միգրանտներից մնալ այդ երկրում՝ մինչ ԱՄՆ իշխանությունները քննում են նրա դիմումը:
Կարդացեք նաև
ԱՄՆ Ներգաղթի և մաքսային ծառայության ղեկավարի պաշտոնում Թրամփի թեկնածուն կամ «սահմանային ցարը», ինչպես նրան կոչել է ամերիկյան մամուլը, Թոմ Հոմանը, ասում է, որ ապօրինի ներգաղթյալների դեմ կոշտ մոտեցումը նպատակ ունի ծառայել ԱՄՆ ազգային անվտանգության ապահովմանը:
«Անօրինական ներգաղթի հետ կապված ամենամեծ ճգնաժամից հետո, որին ականատես ենք եղել այս երկրում, պետք է գա արտաքսման զանգվածային գործողությունը»,- ասում է Հոմանը։
Ներգաղթի հարցով որոշ փորձագետներ, սակայն, զգուշացնում են՝ զանգվածային արտաքսումների կիրառումը կարող է բացասական հետևանք թողնել, քանի որ միգրանտները պարզապես կխուսափեն հայտնել իրավապահներին հանցագործությունների մասին:
«ԱՄՆ-ում ծնված միջին վիճակագրական մարդու համեմատ ներգաղթյալներն ավելի հաճախ են հաղորդում ներկայացնում ոստիկանություն: Սակայն ուսումնասիրությունները բազմիցս ցույց են տվել, որ երբ որևէ տարածքում իրավապահների ուժը գործի է դրվում զանգվածաբար, այն նվազեցնում է հանցագործության մասին հաղորդումների մակարդակը, ներգաղթյալների շրջանում հանցագործության մասին հաղորդումների մակարդակը»,- ասում է Վաշինգտոնում գործող Կատո ինստիտուտի ներկայացուցիչ Դևիդ Բիերը։
Ավելին՝ սկզբնաղբյուր կայքում
