Կառավարության սպասումներով՝ 2024 թվականի վերջին պետական պարտքը կկազմի ՀՆԱ-ի 49,8 տոկոսը, այսինքն՝ կլինի մոտավորապես 50 տոկոսի շրջանակներում։ Այս մասին տարեվերջյան ամփոփիչ ասուլիսում ասաց ֆինանսների նախարար Վահե Հովհաննիսյանը։ «Դա, իհարկե, կախված է ՀՆԱ-ի ցուցանիշի հրապարակումից, որը տեղի կունենա գարնանը։ Բայց մենք նաեւ սպասում ենք, որ ՀՆԱ-ի ցուցանիշը կլինի 5,5 տոկոսի շրջանակներում այս տարի։ Եվ մեր կանխատեսումներով՝ պարտքի մակարդակը սպասվում է 50 տոկոսի շրջանակներում։ Մենք մի քանի նոր գործիքներ ենք ներդրել պարտքի կառավարման հետ կապված»,- ասաց նախարարը։
Վահե Հովհաննիսյանը նշեց, որ ՀՀ կառավարությունը նախատեսում է առաջիկայում հանդես գալ նպատակային պարտատոմսերի թողարկման ծրագրով, ինչպես նաեւ գնաճին կցված պարտատոմսեր կթողարկվեն, որպեսզի նաեւ այս գործիքով մոնիտորինգի ենթարկվեն շուկայի գնաճային սպասումները։ «Հիմա քննարկում ենք եւ արդեն վերջնականացման փուլում է պարտքի մասին նոր օրենքի քննարկումը, որն առաջիկայում կներկայացնենք քննարկման։ Եվ հույս ունենք, որ 2025 թվականի առաջին կեսին պարտքի մասին նոր օրենքը կկարողանանք ընդունել»,- հավելեց նա։
Ռոզա ՀՈՎՀԱՆՆԻՍՅԱՆ
