Երեւան քաղաքի առաջին ատյանի ընդհանուր իրավասության քրեական դատարանի Շահումյան 1 նստավայրում դատավոր Արամայիս Ասատրյանի նախագահությամբ շարունակվեց 2023 թվականին կառավարության շենքի մոտ սեպտեմբերյան հանրահավաքի ժամանակ տեղի ունեցած իրադարձությունների գործով դատավարության հերթական նիստը, որը հանրության շրջանում առավել հայտնի է «Արցախը չհանձնողների գործ» անունով: Այդ ժամանակվանից այս գործով 11 անձ է անցնում:
Պաշտպանվող կողմի շահերը ներկայացնող փաստաբաններից Արսեն Բաբայանը Aravot.am-ի հետ զրույցում ասաց. «Հասել ենք ապացույցների հետազոտմանը, մասնավորապես, վկաների հարցաքննությանը: Հարցաքննվեց մի վկա՝ Գուրգեն Կարոյանը: Դատախազությունը հակասություն էր տեսել նախաքննության ընթացքում եւ դատարանում տրված նրա ցուցմունքների մեջ: Նախաքննական ցուցմունքը հրապարակվեց եւ պարզվեց, որ ոչ մի հակասություն չկա: Ակնհայտ դարձավ, որ այն գործողությունը, որ արել էին քննչականում, ապօրինի գործողություն էր: Կանչել էին մարդուն, նկար էին տվել ու ասել՝ սա այսինչ անուն-ազգանունով այս մարդն է, դու ասա, որ իրեն ճանաչում ես: Այո, 15 տարի առաջ տեսել են իրար, կարծես, նույն թաղում են եղել: Այսինքն, քննչական այս գործողությունը ապօրինի ու անհասկանալի է, որը հետագայում կվիճարկենք»:
Իսկ այս նույն դրվագի մասին պաշտպաններից Հովհաննես Խուդոյանը դատարանի դահլիճում հայտարարեց. «Հանրային մեղադրողը ցանկանում է ցանկալին ներկայացնել որպես իրականություն»:
Կարդացեք նաև
Շարունակելով վկաների հարցաքննության թեման՝ Արսեն Բաբայանը ասաց. «Մյուս վկայի պահով, որը Հայաստանի Հանրապետությունից բացակայում է, դատախազը միջնորդեց, որպեսզի հրապարակվի նրա նախաքննական ցուցմունքը, ես առարկեցի դրա դեմ, ինչը դատարանը բավարարեց և, ըստ էության, մերժեց դատախազի միջնորդությունը:
Կար նաեւ երրորդ վկա, որը անձնական, ընտանեկան պատճառներով չէր կարողացել գալ: Դա հարգելի համարվեց: Նա խոստացել է, որ հաջորդ դատական քննությանը կմասնակցի հարցաքննությանը:
Հաջորդիվ հետազոտելու ենք իրեղեն ապացույցները, հետո տուժողներին ենք լսելու, հետո կլսենք մեղադրյալներին»,-ասաց Արսեն Բաբայանը:
Աշոտ ՀԱԿՈԲՅԱՆ
