Երեւանի ավագանու այսօրվա նիստում Երեւանում տեղական վճարների 2025 թվականի դրույքաչափերը սահմանելու մասին նախագծի հաստատմանն աջակցել է «Հանրային ձայն» խմբակցության ցուցակով ավագանու անդամ ընտրված, այնուհետեւ խմբակցությունը լքած Գրիգոր Հարությունյանը։ Այս նախագծով սահմանվում է նաեւ, որ Երեւանի կենտրոնում «կարմիր գծերի» համար կշարունակի գործել տարեկան 160 հազար դրամ վճարը՝ չնայած նրան, որ դատարանը «կարմիր գծերի» դրույքաչափերը անվավեր էր ճանաչել։
Ավագանու ընդդիմադիր անդամները չմասնակցեցին քվեարկությանը, կողմ քվեարկեց 32 ավագանի, ձեռնպահ քվեարկեց Գրիգոր Հարությունյանը։ Եթե Գրիգոր Հարությունյանը ձեռնպահ չքվեարկեր, քվորում չէր ապահովվի։
Այս դեպքից հետո Գրիգոր Հարությունյանը հայտարարեց ավագանու անդամի մանդատը վայր դնելու մասին։
Կարդացեք նաև
Գրիգոր Հարությունյանի արարքին ավագանու նիստում անդրադարձավ «Մայր Հայաստան» խմբակցության ղեկավար Մանուկ Սուքիասյանը. «Փաստորեն կարմիր կետագծերի որոշումն ինչ մեծ խաղադրույք ուներ, ինչ կարեւորություն էր ներկայացնում, որ մեկ ձեռնպահ քվեարկած ավագանու անդամը, որն ապահովեց քվորումը, նիստից դուրս եկավ ու միանգամից մանդատը դրեց։ Շատ զգայուն տեքստ է գրել՝ պատճառը անձնական է եւ կապված է իմ ընտանիքի հետ։ Ես ուղղակի ուզում եմ հրավիրել մարդու իրավունքների, ժողովրդավարության, տեղական ինքնակառավարման վերաբերյալ միջազգային կառույցների ուշադրությունը, որ ավագանու այն անդամը, որն իշխանությանը մատուցեց ծառայություն, անմիջապես մանդատը դրեց ու իր ընտանիքի վերաբերյալ մտավախություններ ունի»։
Ռոզա ՀՈՎՀԱՆՆԻՍՅԱՆ
