ՀՀԿ խոսնակ Էդուարդ Շարմազանովի ֆեյսբուքյան գրառումը
Արցախը հանձել է Նիկոլ Փաշինյանը եւ վերջ:
Նիկոը հերթական անհեթեթությունն ու սուտն է ասել, իբր 1994թ.-ից հետո բանակցվել է բացառապես Արցախն Ադրբեջանի կազմում մտցնելու մասին:
Սա լկտի սուտ է:
Կարդացեք նաև
Սերժ Սարգսյանի թողած բանակցային փաթեթի արդյունքում Արցախի խնդիրը լուծվելու էր ժողովուրդների ինքնորոշման իրավունքի ամբողջական իրացման՝ հանրաքվեի միջոցով:
Դրա մասին հստակ ասել է ԵԱՀԿ Մինսկի խմբի ռուսաստանցի համանախագահ Պոպովը 2021-ի հունվարի 13-ին:
Սերժ Սարգսյանի բանակցած Կազանյան փաստաթղթի ստորագրումից հրաժարվել է Ադրբեջանը:
Դա փաստել է 2016-ի ապրիլին ՌԴ ԱԳՆ Լավրովը:
Դրա մասին ասել է նաեւ Փաշինյանը 2020-ի հոկտեմբերին արտախորհրդարանական ուժերի հետ հանդիպման ժամանակ:
Եթե փաստաթուղթն Արցախն Ադրբեջանին հանձնելու մասին էր, ինչո՞ւ էր Ալիեւը հրաժարվում այն ստորագրել:
Ավելին. Սերժ Սարգսյանի բանակցած փաթեթի բովանդակությունը կարճ տվել է հենց Իլհամ Ալիևը, որը 2016թ.-ի հոկտեմբերի 7-ին նշել է.«Փակ դռների հետեւում Ադրբեջանից պահանջում են ճանաչել Լեռնային Ղարաբաղի անկախությունը»:
Նույնիսկ Նիկոլ Փաշինյանն է հայտնի ձայնագրության մեջ Արցախի խորհրդարանի պատգամավորներին ասել, որ Պուտինն էլ է իրեն ասել, որ նույնիսկ Ալիեւն է հասկանում Արցախի Ադրբեջանի կազմում չլինելու հանգամանքը:
2020-ի պատերազմի օրերին Փաշինյանը հայտարարել է, որ պատերազմի դադարեցման գինը «5 պլյուս 2» տարբերակն է:
Անգամ 2020-ի հոկտեմբերի 19-20-ի Պուտինի պատերազմը դադարեցնելու առաջարկով «Շուշին մնալու էր հայկական վերահսկողության տակ»:
Բա որ նախկինները համաձայնվել էին Արցախը տալ Ադրբեջանին, ինչո՞ւ էր Փաշինյանն ասում՝ ես բանակցությունը իմ կետից եմ սկսում ու ոչ թե Սերժ Սարգսյանի կետից:
Բա 2018-2020թթ. Հանրապետականը սուր քննադատում էր իրեն հենց նրա համար, որ մերժել է Սերժ Սարգսյանի թողած բանակցային ժառանգությունը:
Նիկոլն էր ասում՝ ինչ պետք է, դա էլ բանակցում եմ:
Նիկոլն էր ասում՝ Արցախը Հայաստան է եւ վերջ:
Նիկոլը պատերազմով հանձնեց Արցախը:
Բա որ Արցախը «հանձնված» էր մինչեւ իրեն, ինչո՞ւ ինքը մարեց 5 հազար ընտանիքի ճրագ:
Ինչո՞ւ, Նիկոլ…
Քո վրա դաջված է կապիտուլյանտի ու Արցախը հանձնողի պիտակը:
Դա ոչ սափրվելով է ջնջվելու ու ոչ էլ՝ կեղծիք տարածելով:
Արցախի հանձնումը ունի կոնկրետ անուն ազգանուն՝ Նիկոլ Փաշինյան:
Արցախը պահելու օպտիմալ տարբերակ կար՝ 2018-ին սատարել Հանրապետականին ու «չմերժել» Սերժ Սարգսյանին:
Հիշեցնենք՝ Նիկոլ Փաշինյանը գրել էր. «1994 թվականից ի վեր, այսինքն` հրադադարից հետո, մեկնարկի պահից՝ բանակցային գործընթացը եղել է Լեռնային Ղարաբաղը Ադրբեջանի կազմ վերադարձնելու մասին:
Ուրիշ որեւէ բովանդակություն բանակցային գործընթացը չի ունեցել: Ուրիշ բովանդակության մասին խոսույթները Հայաստանի Հանրապետությունում ներդրվել են բացառապես ներքաղաքական խնդիրներ լուծելու համար:
Այս համատեքստում ես գործել եմ մի մեծ սխալ. 2018-ին բանակցային բովանդակությանը ծանոթանալով, վերը նշվածը չեմ խոստովանել ինքս ինձ (Ձեզ հայտնի մոդելի հայրենասիրությունս թույլ չի տվել դա անել) եւ հետեւաբար այդ ամենը չեմ պարզաբանել ժողովրդին»:
