«Ի՞նչ են պատասխանում Ալիևին ՀՀ իշխանությունները։ Ես տարակուսած եմ, Նիկոլի Փաշինյանի՝ «Արմենպրեսին» տված հարցազրույցով։ Փորձ է արվում անլրջացնել Ալիևի ասածները, թե արևմտյան Ադրբեջան ասելով` գուցե նկատի ունի Ղազախի կամ Ադրբեջանի՝ ՀՀ-ին սահմանակից այլ տարածքներ»,-ֆեյսբուքյան ուղիղ եթերում հայտարարեց «Արդար Հայաստան» կուսակցության նախագահ, փաստաբան Նորայր Նորիկյանը։
Նա նկատեց՝ Նիկոլ Փաշինյանը հեգնանքով ընդգծում է՝ եթե Ալիևն այդ տարածքների մասին է ակնարկում, ուրեմն դա Ադրբեջանի ներքին գործն է, և խնդիր չունենք․ «Փորձ է անում անցկացնել այն միտքը, որ եթե արևմտյան Ադրբեջան ասելով՝ նկատի ունի ՀՀ-ն, ապա գործ ունենք ագրեսիայի, զավթման հետ։ Նախ նույնիսկ այսպիսի ձևակերպման առկայության պայմաններում ՀՀ գործող իշխանությունը չի տալիս այն հարցի պատասխանը՝ ի վերջո ՀՀ-ն՝ որպես պետություն ունի՞ հստակ դիրքորոշում այսպես կոչված 300 հազար ադրբեջանցիների վերադարձի զառանցանքի վերաբերյալ»։
Ըստ Նորայր Նորիկյանի՝ հայ-ադրբեջանական հարաբերություններում ՀՀ-ն ոչ միայն զրկված է պահանջներ ներկայացնելուց, այլև նույնիսկ խնդրանք ներկայացնելու հնարավորությունից․ «Այս գործընթացում Ալիևը խաղում է միայն հարձակվողի դերում՝ առանց պատասխան գնդակ ստանալու պարտավորության։ ՀՀ-ն այստեղ խաղացող չէ, խաղից դուրս վիճակում ականատես է, թե ինչպես են իր ճակատագրի վերաբերյալ պահանջներ ներկայացվում ու հրամցվում, իրագործվում Ալիևի կողմից։ Ուզում եմ մի հռետորական հարց բարձրացնել Նիկոլ Փաշինյանին՝ դուք ընդհանրապես Ադրբեջանի հետ հարաբերությունների կարգավորման գործընթացում որևէ պահանջ ներկայացնո՞ւմ եք Ադրբեջանին․ «Խաղաղության պայմանագրի շուրջ բանակցություններ եք վարում, դուք որևէ դրույթ՝ որպես պետության ներկայացուցիչ առաջարկե՞լ եք, թե՝ ոչ։ Կարո՞ղ եք հրապարակել՝ խաղաղության պայմանագրի քանի՞ կետն է ՀՀ-ի կողմից առաջարկվել, մերժել, կամ ՀՀ ջանքերի արդյունքում քանի՞սն են դուրս բերվել, ո՞ր կետերն են Ադրբեջանի խնդրանքով հանվել»։
Ըստ Նորայր Նորիկյանի՝ խաղաղության պայմանագրի մասին խոսում է միայն Նիկոլ Փաշինյանը հանրության վստահությունը կամ հանրության մոտ առաջացած համոզմունքը պահելու համար, պատասխանատվությունից խուսափելու համար, քանի որ մեր հասարակությունն իսկապես պատերազմի պատրաստ չէ, և Նիկոլ Փաշինյանը զգացել է զարկերակը և փորձում է այս գաղափարներն օգտագործելով՝ պահպանել իր իշխանությունը․ «Եկել է հաշիվ տալու ժամանակը՝ ո՞ւր է ձեր խոստացած խաղաղության պայմանագիրը, ո՞ւր է ձեր խոստացած 29743 քառակուսի կիլոմետրը, Թուրքիայի հետ հարաբերությունների հաստատումը»։
Կարդացեք նաև
Տաթև ՀԱՐՈՒԹՅՈՒՆՅԱՆ
