«Սա բարձրագույն աստիճանով անբարոյականության քարոզի գերագույն դրսեւորում է»,- այսօր ֆեյսբուքյան ուղիղ եթերի ժամանակ հայտարարեց «Սրբազան շարժման» առաջնորդ Բագրատ սրբազանը՝ անդրադառնալով Նիկոլ Փաշինյանի եւ Աննա Հակոբյանի մի քանի օր առաջ տարածած տեսանյութին այն մասին, որ իրենք ո՛չ եկեղեցով են պսակվել, ո՛չ էլ պետության առաջ են ամրագրել իրենց ամուսնությունը, բայց 27 տարվա համատեղ կյանք ու չորս երեխաներ ունեն:
Սրբազանի բնութագրմամբ՝ մեր կյանքը դարձրել են թատրոն, որի գլխավոր դերասաններն իրենք են, ու սա «հանրային կյանքի դեգրադացում է», սուտն ու կեղծիքն էլ ընտանեկան կյանք է մուտք գործել: Բագրատ սրբազանը նաեւ նկատեց. «Անոնսում են այն մասին, որ ընտանիքը կարեւոր չէ, ընտանիքի սրբությունը, գաղափարը, եկեղեցու, պետության առաջ ստանձնած պարտավորությունները կարեւոր չեն»: Ու այս ամենի մեջ սրբազանին միայն մեկ բան է հետաքրքիր՝ թե ինչպիսի ընտանիքի մոդել են քարոզում Նիկոլ Փաշինյանն ու Աննա Հակոբյանը. «Փորձում եք հանրությանը ցույց տալ, քարոզել, որ այսպես էլ կարելի է ապրել եւ սա կարող է լինել մեր առաջիկա կյանքի մանրակերտը, ձեր պատկերացմամբ՝ իրական Հայաստանի ընտանիքը»:
Ինչեւէ, սրբազանը նաեւ կարծում է, որ մեզ պատուհասած այս ամեն վտանգն ու աղետը նաեւ մեր ինքնամաքրման, ապաշխարության ճանապարհն է, ու այս համատեքստում նա «ուրացողներ եւ դավաճաններ» անվանեց նրանց՝ մարդկանց եւ ինստիտուտներին, ովքեր չեն խոսում այս ամենի մասին, չեն ընդվզում՝ հանուն ունեցվածքի, անձնական հարմարություններից չհրաժարվելու, սեփական վարկանիշից վախենալով:
Դիմելով Նիկոլ Փաշինյանին՝ սրբազանն ասաց, որ նրան վախեցրել է իր՝ ՔՊ-ականներին ապաշխարության դիմումները, ինչը մեծ արձագանք է գտել. «Դու՝ չարիքի, մեղսակցության, հանցակցության մեջ ես դրել ոչ միայն քո կուսակից ընկերներին, որոնցից քայլ առ քայլ հրաժարվում ես՝ դուրս նետելով, դեն շպրտելով, որպես օգտագործված գործիքներ, այլ քեզ ձայն տված բոլորին դրել ես մեղսակցության տակ»: Այն ՔՊ-ականները, որոնք «դուրս չեն շպրտված», ըստ սրբազանի, վախի մեջ են ապրում:
Կարդացեք նաև
Մանրամասները՝ տեսանյութում
Սրբազանի ելույթի այլ մանրամասները՝ այս տեսանյութում
Նելլի ԳՐԻԳՈՐՅԱՆ
