Դեկտեմբերի 21-ը ՄԱԿ-ը հռչակել է մեդիտացիայի համաշխարհային օր: Այդ կապակցությամբ այսօր Հայաստանի ֆիզիկական կուլտուրայի եւ սպորտի պետական ինստիտուտում Հայաստանում Հնդկաստանի դեսպանության հետ համատեղ կազմակերպվել էր յոգային նվիրված միջոցառում, որին մասնակցեց նաեւ Հայաստանում Հնդկաստանի արտակարգ եւ լիազոր դեսպան, նորին գերազանցություն Նիլակշի Սահա Սինհան:
ՀՖԿՍՊԻ ռեկտոր Տիգրան Սիմոնյանը նշեց, որ յոգան որպես Հնդկաստանում հազարամյա պատմություն ունեցող մշակույթ իր հետեւորդներն ունի ամբողջ աշխարհում, այդ թվում՝ Հայաստանում: «Յոգան մարմնի, մտքի եւ հոգու ներդաշնակություն է, ինչը անհրաժեշտ է փոխանցել հանրության լայն շրջաններին»,-ասաց պարոն Սիմոնյանը եւ կարեւորեց յոգայի ներդրումը ՀՖԿՍՊԻ-ում գործող առողջարարական ֆիզիկական կուլտուրա/կինեզիոլոգիա կրթական ծրագրում որպես առողջ ապրելակերպի բաղադրիչ: Նա նաեւ վստահություն հայտնեց, որ կրթօջախի եւ դեսպանության միջեւ համագործակցությունը կտա դրական արդյունքներ:
Կարդացեք նաև
Տիկին դեսպանը շնորհակալություն հայտնեց ջերմ ընդունելության համար եւ չբացառեց, որ կարող է իրական համագործակցություն ծավալվել դեսպանության եւ Հայաստանի մարզական միակ բուհի միջեւ:
Միջոցառման ավարտին նորին գերազանցություն Նիլակշի Սահա Սինհան պատասխանեց Aravot.am-ի հարցերին:
-Տիկին դեսպան: Դուք անձամբ զբաղվո՞ւմ եք յոգայով:
-Իհարկե, զբաղվում եմ, բայց ոչ ամեն օր: Կարծում եմ՝ առավոտյան իմ մարմինն այնքան էլ պատրաստ չէ յոգայի համար: Փորձում եմ վարժությունները երեկոյան ժամերին անել, եթե, իհարկե, հրավիրված չեմ որեւէ ընդունելության, քանի որ ի պաշտոնե պարտավոր եմ նաեւ երեկոյան այցելել տարբեր վայրեր: Այնպես որ, հենց հարմար լինում է, անպայման յոգան ներառում եմ իմ ամենօրյա կյանքում:
-Յոգան մարմնի, մտքի, հոգու ներդաշնակություն է, փիլիսոփայություն, նաեւ հոգեբանություն: Յոգան ինչո՞վ կարող է օգտակար լինել հայ ժողովրդին՝ հաշվի առնելով այն սթրեսային կյանքը, որ մեզ ուղեկցում է վերջին տարիներին:
-Յոգան բոլորի, ամբողջ աշխարհի համար է, քանի որ հիմա մարդկությունը բոլոր երկրներում տարբեր պատճառներով ապրում է ծանր հոգեբանական վիճակում: Հայաստանի ժողովուրդը նույնպես հիմա գտնվում է ծանր հոգեվիճակում: Յոգան միանշանակ կարող է օգնել, քանի որ բացի ֆիզիկական վարժություններից ներառում է նաեւ շնչառական վարժություններ, որոնք հանդարտեցնում են միտքը: Ավելի հանգիստ մտքով ավելի հեշտ կարելի է ծանր իրավիճակները հաղթահարել: Այնպես որ, յոգան, այո կարող է բոլորին օգտակար լինել մտավոր հանգստության հասնելու համար:
Աշոտ ՀԱԿՈԲՅԱՆ
