Այսօրվանից սկսվեց Գյումրու նախկին փոխքաղաքապետ, ԱԺ նախկին պատգամավոր, ՔՊ-ական Դավիթ Առուշանյանի՝ Շիրակի մարզպետի պաշտոնում պաշտոնավարումը։
ՀՀ տարածքային կառավարման և ենթակառուցվածքների նախարար Դավիթ Խուդաթյանը նրան ներկայացրեց Շիրակի մարզի պաշտոնյաներին ու Շիրակի մարզպետի աշխատակազմին՝ վստահ լինելով, որ նա պատվով կկատարի մեծ ծավալի աշխատանքները։
Նախարարի կարճատև ելույթից հետո մասնակիցները մարզպետարանի դահլիճից տեղափոխվեցին մարզպետի առանձնասենյակ՝ խորհրդակցության։
Կարդացեք նաև
Այդ ընթացքում Դավիթ Առուշանյանը շփվեց լրատվամիջոցների ներկայացուցիչների հետ, ճեպազրույց ունեցավ՝ մեկ անգամ ևս շեշտելով, որ սիրում է աշխատել լրագրողների հետ։
Նա լրագրողների հետ զրույցում հայտարարեց, որ Շիրակի մարզպետի համար այս պահին առաջնայինը մարզի խնդիրներին լուծում տալն է, թեև կարևոր են նաև Գյումրու արտահերթ ՏԻՄ ընտրությունները․ անհրաժեշտ է աշխատանք տանել։ Ըստ նրա, մինչև բուն քարոզարշավի մեկնարկը՝ կհասցնի զբաղվել մարզի խնդիրներով, ամփոփել տարին։
Իսկ Շիրակի մարզում կյանքն այնքան էլ հեշտ չէ․ բազում խնդիրներ կան՝ անօթևանության, վթարային շենքերի։
«36 տարի ծեծված խնդիր է անօթևանների խնդիրը, ցավոք, ամեն անգամ մարզպետ փոխվելուց հետո այս նույն հարցը տալիս են նոր մարզպետին, ու մարզպետն ասում է՝ մեր մարզում անօթևանության խնդիր կա։
Ցավոք, նույնն արձանագրելու եմ ես, որ դեռ կա անօթևանության խնդիր։ Ասել, որ եկել եմ անօթևանության խնդիրը հրատապ լուծեմ, չեմ պատրաստվում, բայց կասեմ՝ հնարավոր ամեն ինչ արվելու է, որ օր առաջ կկարողանանք գոնե մեկ հոգու խնդիր լուծել։
Իսկ մարզի ընդհանուր տեսլականը ոնց եմ պատկերացնում, իրականում մարզը ներդրումների մեծ կարիք ունի, կուզենամ, որ մեր բոլոր ներդրողները՝ թե՛ գործարարներ, թե՛ անհատներ, ովքեր կուզենան մարզում ներդրումներ անել, ունենան լիարժեք աջակցությունը կառավարության, մարզպետի և համայնքի ղեկավարների։ Եվ այն թղթաբանությունը, բյուրոկրատական քաշքշուկները, որոնք կան, փորձենք ամեն ինչ անել, որ ներդրողը ուզի գալ մարզում ներդրում անի։
Գիտեք, որ մեր մարզը գյուղատնտեսական մարզ է, բայց շատ ու շատ բաց տեղեր ունենք․ չոռոգվող հողեր ունենք, ունենք հողեր, որոնք ընդհանրապես չեն օգտագործվում, խնդիր ունենք բերքի, անասնագոմերի հետ կապված։
Մտադրություն ունեմ տուն առ տուն մտցնել կառավարության կողմից այն աջակցման ծրագրերը, որոնք կան։ Շատ ու շատ աջակցման ծրագրեր կան, որոնցից մարզի բնակիչները տեղյակ չեն՝ գյուղատնտեսության ոլորտում, արդյունաբերության ոլորտում, շատ ոլորտներում, որտեղ մարդիկ կարող են օգտվել ու իրենց բիզնեսն առաջ տանել, տեղյակ չեն», -ասաց մարզպետը։
Նա անդրադարձավ նաև զբոսաշրջությանն՝ ասելով՝ Շիրակի մարզը յուրահատուկ է, Երերույքի տաճար ունի, Արփի լիճ ունի, Գյումրու սրտում «Կումայրի արգելոց- թանգարան» ունի։
«Ունենք օդանավակայան, որն այդքան էլ լավ չենք օգտագործում, ունենք երկաթգիծ, որն այդքան էլ լավ չենք օգտագործում։ Սրանք, սակայն հնարավորություններ են տալիս թե՛ ներդրումներ անելու և թե՛ զբոսաշրջիկներ բերելու»։
Անդրադառնալով սպանդանոցների թեմային՝ նորանշանակ մարզպետն ասաց՝ կառավարությունն ամեն քայլով փորձում է մեղմացնել, հեշտացնել սպանդանոցների բացումը, որոշումը կմտնի ուժի մեջ ու կխոսեն անասնապահների հետ։ Եվ եթե, ըստ նրա, մասնավորը չուզի հիմնել սպանդանոց, ինքն առաջարկելու է համայնքի ղեկավարներին սուբվենցիոն ծրագրերով հիմնել սպանդանոցներ, քանի որ այդ թեման ավելի կարևոր է, քան երկու ավել ասֆալտապատված փողոց ունենալը։
Դավիթ Առուշանյանը հավաստիացրեց, որ ՔՊ-ի ներսում տարաձայնություններ չկան, բոլորը մեկը մյուսի հետ լավ հարաբերությունների մեջ են։
Ասաց, որ նախորդ մարզպետի կադրերին չի պատրաստվում աշխատանքից ազատել, քանի որ նույն թիմից են։ Կփոխվեն հայեցողական պաշտոններ զբաղեցնողները՝ խորհրդականները, օգնականները։
Մանրամասները՝ տեսանյութում
Նունե ԱՐԵՎՇԱՏՅԱՆ
