«Հյուսիսային տերեւաթափի» գործով մեղադրյալ Սերգեյ Մկրտչյանը ձեզնից երբեւէ ուզե՞լ է այնպիսի ռազմական սարք, միջոց, որի միջոցով հնարավոր էր ոչնչացնել կենդանի ուժ, որեւէ մեքենա, շինություն: Այսօր Երեւան քաղաքի առաջին ատյանի ընդհանուր իրավասության քրեական դատարանի Կենտրոն նստավայրում «Հյուսիսային տերեւաթափի» գործով նիստի ժամանակ հարցաքննվող վկային նման հարց ուղղեց մեղադրող Հովակիմյանը:
«Պարոն դատախազ, Սերգեյ Մկրտչյանն իմ ուսուցիչն է, ինքը ինձնից նման բան չի կարող ուզել: Ինքը կարող է մտնել դեղատուն, ծախսի 5000 դրամ եւ սարքի այնպիսի մի բան, որ մի շենքից ոչ մի բան չմնա»,- մեղադրողի հարցին պատասխանեց վկա Դավիթ Գրիգորյանը: Նա ներկայացավ, որ մինչեւ 1994 թվականը եղել է Արցախի ՊԲ հատուկ հետախուզության պետը: Նա ասաց, որ 1994 –ի մայիսի 12-ին դուրս է եկել ծառայությունից, որովհետեւ դեմ է եղել զինադադարի կնքման պայմանագրից:
Վկան հայտնեց՝ քաղաքականությամբ չի զբաղվում ու ծանոթ չէ գործով մեղադրյալ Սերգեյ Մկրտչյանի քաղաքական հայացքներին. «Ես ասում եմ, որ իմ քույրեր, եղբայրները 9 ամիս բլոկադայի մեջ են եղել, ՀՀ –ն որեւէ մի բան չի արել, այդ մարդկանց խաբել է, մենք ընկերներով որոշել ենք, որ բլոկադան բացենք, դե՞մ եք դրան »:
Նիստը նախագահողը հստակեցրեց՝ հենց դրա մասին ենք խոսում, որ Ձեր խոսքից ստացվում է այնպես, որ այսօրվա ՀՀ գործող իշխանության Արցախի հետ կապվա՛ վարվող քաղաքականությանը դեմ եք: Վկան ճշգրտեց. «Ոչ միայն այս իշխանության, այլ Լեւոնից մինչեւ այսօր: Սերժից էլ, Ռոբիկից էլ, Լեւոնից էլ, Նիկոլից էլ, որովհետեւ իրենք են հասցրել այս վիճակին» :
Կարդացեք նաև
Նիստը նախագահողը հետաքրքրվեց՝ այդ կարծիքի՞ն էր Սերգեյ Մկրտչյանը: Վկան պատասխանեց՝ չգիտի:
Նա հավելեց, որ պետությունը ցանկանում է մեկուսացնել այն մարդկանց, որոնք կարող են զենքով խնդիրներ լուծել. «Օրական դիվերսանտներ են անցնում, խնդրում եմ բռնեք իրական դիվերսանտներին»:
Հիշեցնենք, որ ԱԱԾ համապատասխան ստորաբաժանումների կողմից իրականացված օպերատիվ-հետախուզական միջոցառումների արդյունքում ձեռք բերված փաստական տվյալներով հիմնավորվել էր, որ մի խումբ անձինք, ունենալով հակաիշխանական հայացքներ և համաձայն չլինելով Հայաստանի Հանրապետության կառավարության կողմից վարած արտաքին և ներքին քաղաքականության հետ, խմբի կազմում, 2023 թվականի մայիսին նպատակադրվել են իրականացնել անձի առողջությանը վնաս պատճառելու, կյանքից զրկելու, խոշոր չափերի գույքային վնաս պատճառելու և այլ ծանր հետևանքներ առաջացնելու վտանգով զուգորդված պայթյուններ, հանրավտանգ այլ արարքներ, զավթել և պահել շինություններ, հաղորդակցության միջոցներ, այդ կերպ ահաբեկել բնակչությանը, դրա առանձին խմբերին, կազմալուծել հանրային իշխանության մարմինների գործունեությունը, հանրային իշխանության ներկայացուցիչներին, պետական և հանրային ծառայողներին հարկադրել կատարել իրենց պահանջները, այդ թվում՝ դադարեցնել լիազորությունների հետագա իրականացումը:
Արփինե ՍԻՄՈՆՅԱՆ
