«Տպավորություն է, որ ֆիլմի գրաքննությունը թերեւս մի բան է, այնինչ ֆիլմի գրաքննությունը նույնն է, ինչ հուշարձանի վերացումը: Հուշարձանը դրսում է, նրա հանդիսատեսը դրսում է, ֆիլմը կինոթատրոններում է, եւ եթե կինոթատրոններում ցույց չեն տալիս, նույնպես վերացնում են ստեղծագործողի արտահայտման իրավունքը»,-նշեց վավերագրող ռեժիսոր Հովհաննես Իշխանյանը՝ հայկական ֆիլմերը ադրբեջանական սպառնալիքների ներքո փառատոններից հանելու թեմայով ասուլիսում:
«Այս տարի աշնանը Ադրբեջանի ճնշումների արդյունքում հայկական 2 ֆիլմ է գրաքննվել՝ Կատյա Սպիվակովայի «Այն ամենն, ինչ ինձ պետք է» (All I Need)՝ խաղարկային եւ Սարին Հայրապետյանի «Տունս քաղցր ա» (My Sweet Land) վավերագրական ֆիլմերը: Առաջինը Մարոկկոյի FINIFA կինոփառատոնից է հանվել, իսկ Սարին Հայրապետյանի ֆիլմը Հորդանանը ներկայացրել էր «Օսկարի»՝ «Լավագույն միջազգային ֆիլմ» անվանակարգում, սակայն հետո հետ է կանչվել:
Այս առիթով Հայաստանի դիվանագիտական հիմնադրամի հետ նամակ ուղղեցինք Արտաքին գործերի եւ ԿԳՄՍ նախարարություններ: Պատասխանն այն էր, որ ռեժիսորներն իրենց չեն դիմել, դրա համար այդ գործով չեն զբաղվել:
Կարդացեք նաև
Շատ տարօրինակ է նրանց պատասխանը, ենթադրենք, Ադրբեջանը Ստեփանակերտում որոշի «Մենք ենք, մեր սարերը», որ հանրությանը առավել հայտնի է «Տատիկ-պապիկի արձան» անունով, ոչնչացնի: Ինչ է, արձանի լուսահոգի քանդակագործ Սարգիս Բաղդասարյա՞նը պետք է դիմի ԱԳ նախարարություն:
Ամբողջ ադրբեջանական մամուլը, նրանց արտգործնախարարությունը հայկական ֆիլմերի գրաքննության մասին հայտնել են: Եվ սա առաջին դեպքը չէ: Օրինակ, Ջիվան Ավետիսյանի «Դրախտի դարպասները» ֆիլմը Մոսկվայի միջազգային կինոփառատոնից հանվել է 2020թ հոկտեմբերին: Ընդ որում, այդ ժամանակ Ջիվան Ավետիսյանին աջակցել էին ՀՀ ԱԳ եւ ԿԳՄՍ նախարարությունները: Ադրբեջանը նաեւ կարողացել է Լիտվայի կինոկենտրոնին ճնշել, որ 100 հազար դրամաշնորհը վերադարձնեն: Եղել է դեպք Անահիտ Աբադի «Եվա» ֆիլմի հետ կապված՝ Պոլսի միջազգային կինոփառատոնում: Թուրքիայի ԱԱԾ-ն ներխուժել էր, փակել է փառատոնը, առգրավել է hard driver-ը, եւ ֆիլմն այդ փառատոնից հանվել էր: Ոտնձգություններ են փորձել իրականացնել նաեւ Իննա Սահակյանի «Ավրորայի լուսաբացը» անիմացիոն ֆիլմի դեմ, սակայն հաջողության չեն ասել»,-հավելեց Հովհաննես Իշխանյանը:
Նա նաեւ ընթերցեց նաեւ Կատյա Սպիվակովայի եւ Սարին Հայրապետյանի խոսքը, քանի որ նրանք Հայաստանում չէին գտնվում:
Մանրամասն՝ տեսանյութում.
Գոհար ՀԱԿՈԲՅԱՆ
