«Այն, ինչ չի անում իշխանությունը, անհրաժեշտ է, որ անի հասարակության գիտակից խավը։ Հայաստանի ակադեմիական հանրությունը պարտքի տակ է իր ժողովրդի հանդեպ, քանի որ այն, ինչ արվում է՝ վտանգ է ամբողջ հայ ժողովրդի համար»,- այս կարծիքին է ՀՀ մարդու իրավունքների առաջին պաշտպան Լարիսա Ալավերդյանը։
Ադրբեջանի նախագահը երեկ հերթական պահանջն է ներկայացրել՝ 300 հազար ադրբեջանցի պետք է վերադառնա Հայաստան եւ բնակություն հաստատի այստեղ։
«Սա վերին աստիճանի ագրեսիվ քաղաքականություն է, որը ունի ապագա։ «Ապագա կա, ապագա» կարգախոսով թուրք-ադրբեջանական շահերն է սպասարկում այս իշխանությունը եւ ոչ մի միլիմետր չի շեղվել այն ծրագրից, ինչի համար իրենց բերել են»,- լրագրողների հետ զրույցում ասաց տիկին Ալավերդյանը՝ ուշադրություն հրավիրելով, որ Ալիեւը խոսում է ոչ միայն վերադարձի, այլ «հայրենիք վերադարձի» մասին։
Ըստ Լարիսա Ալավերդյանի, Ադրբեջանն իր այս ռազմավարությունը մշակում էր դեռ 1960-ականներից սկսած, սա իր համար նորություն չէ, բայց ՀՀ օրվա իշխանության լռությունը նա պերճախոս է համարում։ Թեեւ չի զարմանում, քանի որ ինքը գիտեր թե 2018-ին այս թիմն ինչի համար է եկել։
Կարդացեք նաև
«Այս մի քանի տարիների ընթացքում ինչ որ տեղի է ունենում մեր տարածաշրջանում, պայմանավորվածությունների արդյունք է՝ Թուրքիա-Ադրբեջան-ՀՀ իշխանություն։ Պայմանավորվածությունները ուղղակի կյանքի են կոչվում»,- ասաց նա՝ հիշեցնելով, որ ՀՀ առաջին նախագահն էլ էր այն կարծիքին, որ Արցախը հանձնելով՝ մնացյալ հարցերը կարգավորում կստանան, իսկ ՀՀ գործող իշխանությունը ոչ միայն Արցախը, այլ նաեւ Հայաստանն է հանձնում։ Լարիսա Ալավերդյանի կարծիքով, Լեւոն Տեր-Պետրոսյանը մոլորության մեջ էր՝ այդպես կարծելով, իսկ ՀՀ գործող իշխանությունը համոզմունքով է անում ամենը։
«Ես Եվրոպայից ոչինչ չեմ սպասում, Քրեական դատարանով պետք է հարցերը լուծենք եւ տվյալ դեպքում ոչ թե դատվելու է Ադրբեջանը, այլ Ադրբեջանի գործող իշխանությունը»,- հավելեց Լարիսա Ալավերդյանը՝ ասելով, որ այս առումով իր մոտեցումները համընկնում են միջազգային քրեական դատարանի առաջին դատախազ Լուիս Մորենո Օկամպոյի մոտեցումների հետ․ անհրաժեշտ են մասսայական դիմումներ միջազգային քրեական դատարանի գործող դատախազին, այն մասին, որ Ադրբեջանի քաղաքականությունն ու գործողությունները ցեղասպանական բնույթ ունեն։
Մանրամասները՝ տեսանյութում
Նելլի ԳՐԻԳՈՐՅԱՆ
