Այս տարի աշնանը Ադրբեջանի ճնշումների արդյունքում հայկական երկու ֆիլմ է գրաքննվել՝ Կատյա Սպիվակովայի «Այն ամենն, ինչ ինձ պետք է» (All I Need)՝ խաղարկային եւ Սարին Հայրապետյանի «Տունս քաղցր ա» (My Sweet Land) վավերագրական ֆիլմերը: Հայկական ֆիլմերի հանդեպ ոտնձգությունները շարունակվում են, դրա համար էլ հայկական ֆիլմերը պաշտպանելու գործընթաց է սկսվել մի քանի նախաձեռնությունների կողմից:
«Այս ասուլիսը վերաբերվում է միջազգային կինոփառատոններին ներկայացվող հայկական ֆիլմերի հանդեպ ադրբեջանական պետական մեքենայի ոտնձգություններին, եւ այդ ոտնձգությունների պարագայում՝ Հայաստանի Հանրապետության համապատասխան մարմինների տոտալ անգործությանը»,-Շառլ Ազնավուրի հրապարակում հրավիրված ասուլիսում ասաց «Հայաքվեի» նախաձեռնող խմբի անդամ Մենուա Սողոմոնյանը:
Նրա խոսքով. «Տարբեր երկրներում միջազգային կինոփառատոններին ներկայացվող հայկական ֆիլմերը, մանավանդ նրանք, որոնց մեջ կա ազգային բովանդակություն, հայկական օրակարգ, Արցախի հետ որեւէ առնչություն, հետեւողականորեն ադրբեջանական դիվանագիտական միջամտություններով դուրս են բերվում կամ հանվում են կինոփառատոնների օրակարգից: Իսկ երբ համապատասխան հարցով դիմում ենք ներկայացնում պատկան մարմիններին, մասնավորապես ԱԳ նախարարությանը, ԿԳՄՍ նախարարությանը, որոնք ի պաշտոնե, իրենց կանոնադրության, գերատեսչական շահերի բերումով պետք է միջամտեին այդ գործընթացներին եւ պաշտպանեին հայկական ֆիլմերը ադրբեջանական ոտնձգություններից, զանազան պատճառաբանություններ են բերում՝ ասելով, որ ոչինչ չեն կարող անել:
Իսկ մեր գնահատականը հետեւյալն է՝ սա եւս մեկ դրսեւորում է հանրային կյանքում պետության չգոյության, իր քաղաքացիների, իր իրավաբանական անձանց իրավունքների եւ շահերի միտումնավոր չպաշտպանություն: Այնպես չէ, որ պետությունը տեղեկություն չուներ այս ամենի վերաբերյալ…»:
Կարդացեք նաև
Հավելենք, որ հայկական ֆիլմերը Ադրբեջանի սպառնալիքների պատճառով փառատոներից հանելու, Օսկարից հետ կանչելու թեմայով ասուլիսը նախաձեռնել էին «Հայաքվե» քաղաքացիական միավորումը, Հայաստանի դիվանագիտական հիմնադրամը, «Պլատֆորմ Դոկ» վավերագրական ֆիլմերի հարթակը եւ «Ակն ընդ ական» համայնքը:
Մանրամասն՝ տեսանյութում.
Գոհար ՀԱԿՈԲՅԱՆ
