Հոր հետ կապված պատմությունից հետո նախարար Գևորգ Պապոյանը Հովիկ Աղազարյանի որդուն փոխանցել է, որ ճիշտ կլինի՝ ազատվի աշխատանքից, ՔՊ խորհրդի անդամ Հովսեփ Աղազարյանն էլ գրել է դիմումը։
Թեմայի մասին «Հրապարակը» զրուցել է փաստաբան Միհրան Պողոսյանի հետ:
Միհրան Պողոսյանն էլ ասաց. «Աշխատանքային օրենսգիրքը սահմանում է անձին աշխատանքից ազատել միայն որոշակի հիմքերով, օրինակ, երբ կորցնում է աշխատողն իր վստահությունը, բայց դա չի նշանակում, որ ամեն մի նման պատճառով օրենքը թույլ է տալիս անձին ազատել: Վստահություն կորցնելը պետք է բացատրվի այն հանգամանքով, ասենք, եթե անձը կատարել է հանցանք եւ այլն: Հստակ է մի բան, որ ուղղակիորեն չի կարելի անձին պաշտոնից ազատել: Օրենքը նման հնարավորություն չի տալիս, բացառությամբ քաղաքական պաշտոն զբաղեցնող անձանց, որոնք այդ կանոններին չեն ենթարկվում: Օրինակ, նախարարներին ազատեցին աշխատանքից, այդտեղ այս տեսանկյունից չկա խնդիր, հիմքեր պարտադիր չեն: Դրանով են քաղաքական եւ հայեցողական պաշտոնները տարբերվում իրարից: Ինչ վերաբերում է Աղազարյանի որդուն, ապա նա քաղաքական պաշտոնյա չէ, եւ նրան աշխատանքից ազատելն անօրինական է: Չի կարելի սուբյեկտիվ գործառույթներ կիրառել նման հարցերում: Օրինակ, եթե ինչ-որ մի պահեստապետի ազատում են աշխատանքից, պետք է անձը մեղադրվի գողության մեջ, եւ դա ուղիղ հիմք լինի աշխատանքից ազատման: Հիմքերը չպետք է վերացական լինեն, հակառակ դեպքում սուբյեկտիվիզմը կարող է լինել չափազանց մեծ: Պետք է պարտադիր իրադարձություն տեղի ունենա, ըստ դրա` նման ընթացք ստանա: Մրցութային կարգով աշխատանքի անցած մարդուն ոչ մի իրավունք չունեն ազատելու աշխատանքից` սա էլ առանձին թեմա է»:
Հայկ ԳԵՎՈՐԳՅԱՆ
Կարդացեք նաև
Հոդվածն ամբողջությամբ՝ «Հրապարակ» օրաթերթի այսօրվա համարում:
