Կորեան Հայաստանի առանցքային գործընկերներից է Արեւելյան Ասիայի տարածաշրջանում, եւ մենք մեծ նշանակություն ենք տալիս մեր հարաբերությունների հետագա զարգացմանը. ողջունելով Կորեայի միջազգային համագործակցության գործակալության (ԿՄՀԳ) Զարգացման պաշտոնական աջակցության հետազոտության եւ կրթության կենտրոնի ղեկավար Պարկ Սունջինին՝ ասել է ՀՀ ԱԺ ֆինանսավարկային եւ բյուջետային հարցերի մշտական հանձնաժողովի նախագահ Ծովինար Վարդանյանը:
Հանդիպումը տեղի է ունեցել դեկտեմբերի 18-ին, որին մասնակցել է նաեւ Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նախագահի տեղակալ Թագուհի Ղազարյանը:
Ծովինար Վարդանյանն ընդգծել է Հայաստանի եւ Կորեայի միջեւ միջազգային կազմակերպությունների շրջանակում համագործակցության կարեւորությունը: Նա նշել է, որ Հայաստանի կառավարությունը բարձր է գնահատում Կորեայի միջազգային համագործակցության գործակալության (ԿՄՀԳ) աջակցությունը:
Որպես Հայաստան-Կորեա բարեկամական խմբի ղեկավար՝ Ծովինար Վարդանյանն ընդգծել է երկու երկրների միջեւ խորհրդարանական ձեւաչափով ակտիվ համագործակցության անհրաժեշտությունը:
Կարդացեք նաև
Հանձնաժողովի նախագահը նշել է, որ համագործակցությունը քաղաքական, տնտեսական, գիտական, կրթական, մշակութային ոլորտներում ունի հսկայական չիրացված ներուժ, եւ համատեղ ջանքերով կարող են հասնել շոշափելի ու ազդեցիկ արդյունքների:
Պարկ Սունջինը, շնորհակալություն հայտնելով ջերմ ընդունելության եւ խոսքերի համար, նշել է, որ համատեղ աշխատելու եւ մի շարք ոլորտներում բազմաթիվ ծրագրեր կյանքի կոչելու պատրաստակամություն կա:
Ծովինար Վարդանյանն ընդգծել է, որ հայկական կողմն առանձնահատուկ նշանակություն է տալիս Հայաստանում Կորեայի դեսպանատան բացմանը: Նրա խոսքով Երեւանում մշտական դիվանագիտական ներկայացուցչության հիմնումը նոր խթան կհանդիսանա երկկողմ հարաբերությունների եւ բոլոր հնարավոր ոլորտներում համագործակցության խորացման համար:
Թագուհի Ղազարյանը ներկայացրել է «Ակադեմիական քաղաք» նախագիծը՝ նշելով, որ այն իրականացնելու համար Հայաստանն անհրաժեշտություն կունենա համագործակցելու բարձրագույն կրթության ոլորտում որակյալ փորձ ունեցող գործընկերների հետ: Նրա խոսքով Կորեայի Հանրապետությունը կարող է լինել նման գործընկեր մեր երկրի համար:
Կողմերը մտքեր են փոխանակել երկու երկրների միջեւ համագործակցության հեռանկարների մասին: Ընդգծվել է, որ Կորեայի հարուստ փորձը կարող է արդյունավետ օրինակ դառնալ մի շարք ոլորտների զարգացման գործում:
ՀՀ Ազգային ժողով
