Կարծում եմ, ավելի ճիշտ է նման հարցերն ուղղել Երեւանին՝ հասկանալու համար, թե Հայաստանի իշխանություններն ինչպե՞ս են վերաբերվում նման պահանջներին․ այսօր կայացած ասուլիսում ասաց ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով հայաստանցի լրագրող Հայկ Խալաթյանի հարցին՝ ինչպե՞ս է պաշտոնական Մոսկվան վերաբերվում Ադրբեջանի նախագահի կողմից Հայաստանին ներկայացվող անընդհատ պահանջներին՝ խաղաղության բանակցությունների ֆոնին։
ՌԴ ԱԳՆ ներկայացուցիչը հավելեց, որ պաշտոնական Մոսկվայի տեսակետը մեկ անգամ չէ, որ հրապարակվել է՝ բարձր մակարդակում քննարկման թեմա են մարդասիրական հարցերը, մասնավորաբար, փախստականների իրավունքների, մշակութային եւ հոգեւոր ժառանգության պահպանումը, ռազմագերիների փոխանակումը եւ այլն։ Նա հայտարարեց՝ պաշտոնական Մոսկվան պատրաստ է աջակցել, եթե կողմերը դեմ չեն լինի։
Հարց հնչեց նաեւ այն մասին, որ օրերս Ադրբեջանի իշխանությունները երրորդ երկրի միջոցով առաջարկ են փոխանցել Հնդկաստանի իշխանություններին՝ զենք-զինամթերքի առուվաճառքի շուրջ բանակցություններ սկսելու մասին, մինչդեռ Հնդկաստանի իշխանությունները մերժել են առաջարկը։ Լրագրողի դիտարկմամբ՝ հայաստանյան պրոիշխանական հեռուստաալիքների մեկնաբանությունները եզրահանգումների տեղիք են տալիս, որ այդ երրորդ՝ բարեկամական երկիրը, ՌԴ-ն է։
«Հայաստանում պրոիշխանական մամուլը շատ բան է փորձում ներշնչել։ Երբեմն այնպիսի անհեթեթություններ են տարածում․․․ եթե կարդաս, կարծում եմ, կարող ես հիվանդանալ․․․ ավելի լավ է՝ չկարդալ»,- եղավ Մարիա Զախարովայի արձագանքը։
Կարդացեք նաև
Իսկ Հնդկաստանի հետ Հայաստանի եւ Ադրբեջանի ռազմատեխնիկական համագործակցությունը համարեց այդ երկրների խնդիրը, որը մեկնաբանելու առիթ Մոսկվայում առայժմ չեն տեսնում։
Մանրամասները՝ տեսանյութում
Նելլի ԳՐԻԳՈՐՅԱՆ
