Դեկտեմբերի 16-ին hraparak.am կայքը լուսանկար էր հրապարակել Նոյեմբերյանի պետական քոլեջից, որում երևում էր ջեռուցման համակարգի բացակայությունը: Դասասենյակը ջեռուցվում է վառելափայտի օգնությամբ:
Խնդրին մանրամասն ծանոթանալու համար Aravot.am-ը կապ հաստատեց Նոյեմբերյանի պետական քոլեջի տնօրեն Կարեն Նազարյանի հետ: Վերջինս նշեց, որ դասախոսություն է կարդում, իսկ թեմային կանդրադառնան քոլեջի ֆեյսբուքյան էջում:
Լուսանկարը` Նոյեմբերյանի պետական քոլեջի ֆեյսբուքյան էջից
Արդեն ուշ երեկոյան Նոյեմբերյանի պետական քոլեջի ֆեյսբուքյան էջը հայտարարություն տարածեց հետևյալ գրությամբ.
«ՆՈՅԵՄԲԵՐՅԱՆԻ ՊԵՏԱԿԱՆ ՔՈԼԵՋԸ ԿՈՒՆԵՆԱ ՆՈՐ ՀԱՄԱԼԻՐ
Կարդացեք նաև
Նոյեմբերյանի պետական քոլեջը վստահ քայլերով առաջ է գնում և արձանագրում իր նոր հաջողությունները: Վերջապես, 2025թ-ից կմեկնարկի Նոյեմբերյանի պետական քոլեջի նոր համալիր շենքի կառուցման շինարարական աշխատանքների գործընթացը: Ըստ նախագծի՝ ուսուցումը լիարժեք կազմակերպելու համար, քոլեջը կունենա մասնագիտացված հարմարավետ լսարաններ, արհեստանոցներ, լաբորատորիաներ և կաբինետներ՝ հագեցած ժամանակակից տեխնիկայով, մասնագիտական պարագաներով և գույքով: Կկառուցվեն ուսումնական, վարչատնտեսական մասնաշենքեր, հանրակացարան, մարզադահլիճ, մարզահրապարակ, ավտովարման հրապարակ, հանգստի և ժամանցի գոտիներ: Շենք֊շինությունները կապահովվեն լոկալ ջեռուցմամբ։
Վստահ ենք, որ Նոյեմբերյանի պետական քոլեջը մոտ ապագայում կունենա այնպիսի բարեկեցիկ և հարմարավետ միջավայր, որը կապահովի ոչ միայն արդյունավետ ուսուցում, այլև կբավարարի ուսանողների բոլոր պահանջներն ու քմահաճույքները»:
Հայտարարությունից հասկանալի չէ, թե ե՞րբ որոշվեց կառուցել նոր համալիր կամ ինչ միջոցներով:
