«Շատ կարեւոր է, որ համայնքի ղեկավարի ժամանակավոր պաշտոնակատարը լինի գյումրեցիների սրտով, որ ով ավելի շատ ձայն հավաքի՝ ինքն էլ նշանակվի։ Հիմի, եթե գյումրեցիները երկրորդ տեղ ինձ ավելի շատ համակրանք ունեն, ինչի չէ, մարզպետ նշանակվելու հարցում․․․»,- խորհրդարանում լրագրողների հետ զրույցում ասաց ԱԺ ՔՊ-ական պատգամավոր Դավիթ Առուշանյանը։
Նա անցած չորեքշաբթի մանդատը վայր դնելու դիմում է գրել, գործընթացը յոթ օր է տեւելու եւ եթե թղթաբանությունը հասցնեն, ապա իր՝ մարզպետի պաշտոնում նշանակումը, ամենայն հավանականությամբ, տեղի կունենա կառավարության առաջիկա նիստում։
«Վարչապետը շնորհակալություն է հայտնել պարոն Մուրադյանին իր կատարած աշխատանքի համար։ Թե ինչից է դժգոհ եղել, ինչ խնդիրներ կային` չեմ կարող ասել»,- ասաց Դավիթ Առուշանյանը՝ հավելելով, որ Շիրակի նախկին մարզպետ Մուշեղ Մուրադյանն աշխատանքից ազատվել է իր դիմումի համաձայն։
Դիտարկմանը՝ Մուշեղ Մուրադյանի համար կարծես անակնկալ էր իր ազատումը, քանի որ կառավարության նիստից առաջ նա հերքում էր ազատման մասին լուրերը՝ Առուշանյանը պատասխանեց. «Չեմ կարող դա մեկնաբանել, միայն կասեմ, որ չեմ կարծում, որ պարոն Մուրադյանը դիմումը գրել է կառավարության նիստի ժամանակ։ Չի լինում այնպես, որ վարչապետը կառավարության նիստի ժամանակ որոշի, որ հեռացնում է։ Եթե դուք մտածում եք, որ անակնկալ էր պատրաստված, ապա միանշանակ՝ ոչ»։
Կարդացեք նաև
Լրագրողների դիտարկմանը՝ ստացվում է, որ ՔՊ-ն խաբել է գյումրեցիներին, քանի որ ասվում էր, որ Գյումրու քաղաքապետի թեկնածու Սարիկ Մինասյանը կուսակցական չէ, բայց հիմա նա ՔՊ-ին անդամակցելու որոշում է կայացրել, Դավիթ Առուշանյանը պատասխանեց․ «Մենք ընդհանրապես ոչ մեկին չենք խաբում, իսկ գյումրեցիներին հնարավոր էլ չէ խաբել, որովհետեւ չէր ասված միայն կուսակցականներ եւ հասարակ քաղաքացիներ, ասված էր՝ կուսակցականներ, համակիրներ եւ համախոհներ։ Այսինքն, պարոն Մինասյանը ՔՊ-ի որդեգրած ճանապարհից, մեր քաղաքականությունից, մեր գաղափարախոսությունից հեռու մարդ չէր»։
Մանրամասները՝ տեսանյութում
Նելլի ԳՐԻԳՈՐՅԱՆ
