«Հայաստանի Հանրապետությունից ավելի ցածր գնաճով ընդամենը մեկ երկիր կա՝ Կոստա Ռիկան: Մենք նախավերջինն ենք 200 երկրների մեջ»,- դեկտեմբերի 12-ին լրագրողների հետ ունեցած ճեպազրույցի ժամանակ նշել է ՀՀ էկոնոմիկայի նախարար Գևորգ Պապոյանը:
«Փաստերի ստուգման հարթակն» ուսումնասիրել է նշված տեղեկատվությունն ու պարզել, որ նախարարի կողմից հնչեցված հայտարարության հիմքում, ըստ ամենայնի, Արժույթի Միջազգային հիմնադրամի կանխատեսումներն են:
Հիմնադրամի կանխատեսումները քարտեզագրված են և ներկայացնում են գնաճի տարեկան ցուցանիշները՝ թվով 236 երկրների մասով:
Ըստ այդ կանխատեսումների, Հայաստանը տարին կամփոփի 0.2 տոկոս գնաճով: Կոստա Ռիկայի դեպքում հիմնադրամը ոչ թե գնաճ, այլ գնանկում է կանխատեսել. այն կկազմի -0.3 տոկոս:
Կարդացեք նաև
Ի դեպ, Կոստա Ռիկան միակ երկիրն է ցանկում, որն այս տարին կամփոփի գնանկմամբ: Ինչ վերաբերում է Հայաստանի գնաճի ցուցանիշին, ապա նախարարի պնդումը մասամբ ճիշտ է, մասամբ՝ ոչ:
Եվ այսպես, նախարարը ճիշտ է՝ Հայաստանը զբաղեցնում է երկրորդ հորիզոնականը՝ գնաճի ցածր ցուցանիշով, սակայն ճիշտ չէ 200 երկրների մասով պնդումը:
Ինչպես նշեցինք, հիմնադրամը ներկայացնում է կանխատեսումներ թվով 236 երկրների համար: Նրանցից 46-ի մասով, սակայն, հիմնադրամի կայքում տվյալներն ուղղակի բացակայում են: Սա նշանակում է, որ ցածր գնաճի կանխատեսումներով Հայաստանը երկրորդն է ոչ թե 200, այլ 191 երկրների ցանկում:
Կոստա Ռիկայից ու Հայաստանից հետո ամենացածր գնաճն ունեն հետևյալ երկրները.
Չինաստան 0.4%
Թայլանդ 0.5%
Բրունեյ Դարուսսալամ 0.5%
Կամբոջա 0.7%
Սեյշելյան կղզիներ 0.8%
Լիտվա 0.9%:
Ինչ վերաբերում է հարևան երկրներին, Վրաստանը, ըստ կանխատեսումների, տարին կամփոփի 1.1, Ադրբեջանը՝ 2.1, Իրանը՝ 31.7, Թուրքիան՝ 60.9 % գնաճով:
Գայանե ՄԱՐԿՈՍՅԱՆ
Հոդվածն ամբողջությամբ՝ «Փաստերի ստուգման հարթակում»
