Aravot.am-ը Գյումրու քաղաքապետի անկուսակցական պաշտոնակատար Սարիկ Մինասյանից հետաքրքրվեց, թե պատրաստվո՞ւմ է արդյոք անդամակցել «Քաղաքացիական պայմանագիր» կուսակցությանը՝ մարտի 30-ին Գյումրիում կայանալիք արտահերթ ՏԻՄ ընտրություններին ՔՊ-ի ցուցակը գլխավորելու նպատակով, և ՔՊ-ական դառնալու դեպքում կստանա՞ արդյոք գյումրեցիների վստահության քվեն։
Մենք հիշեցրեցինք, որ ըստ հրապարակումների, հնչած կարծիքների՝ «Քաղաքացիական պայմանագիրը» ցածր վարկանիշ ունի հանրապետության երկրորդ քաղաքում։
Սարիկ Մինասյանը կոնկրետ պատասխան չտվեց մեր հարցին՝ ո՛չ հաստատեց, ո՛չ հերքեց։
«Տեսեք ցանկացած կուսակցության վարկանիշ բարձր է կամ ցածր է՝ կախված տվյալ անձանցից, այսինքն՝ ովքեր են կուսակցության անդամները և ինչպես իրենց կդրսևորեն իրենց վստահված պաշտոններում։
Կարդացեք նաև
Գյումրին առանձնահատուկ քաղաք է․ միշտ ոչ թե կուսակցությունների ընտրություն է կատարել, այլ իր քաղաքապետի՝ անձի։ Եթե որոշում ընդունեմ ՝ անդամագրվելու կամ չանդամագրվելու, հաստատ գյումրեցին առաջնային կգնահատի իմ անձը, ինչպիսի քաղաքապետ եմ, ինչ եմ կարողացել անել, նախկինում ով եմ եղել և իր ընտրությունը ճիշտ կկատարի», -պատասխանեց նա։
Այն հարցին էլ, թե «փրայմերիզի» արդյունքները կանխատեսելի՞ էին իր համար, որ կհաղթի ՔՊ-ական թեկնածուներին, պատասխանեց․ «Եթե կանխատեսելի չլիներ, այդ քայլին չէի գնա»։
Անդրադառնալով իրենց թաղում «փրայմերիզ» անցկացնելուն, Սարիկ Մինասյանը նշեց՝ եթե 44 տարի ապրում է տվյալ թաղամասում, իր հարևանները, ընկերները չվստահե՞ն, չքվեարկե՞ն իր օգտին։
«Այնպես եմ անելու, ոչ միայն մեր թաղում, այլ Գյումրիում․ Գյումրու բոլոր թաղերն իմն են, նրանց հետ էլ շփումը շատացնեմ, որպեսզի ճանաչեն, հասկանան՝ արժե՞ ինձ վստահել քաղաքի ղեկն արտահերթ ընտրությունների ժամանակ․ որոշողը գյումրեցին է»։
Մանրամասները՝ տեսանյութում
Նունե ԱՐԵՎՇԱՏՅԱՆ
