«Բռնություն ասվածն ինչ բառերի մեջ է վարույթ իրականացնող մարմինը տեսնում: Ես անձամբ երկրի վարչապետի բառերի մեջ խնդիր եմ տեսնում: Դա այլ արարք ունի, ոչ քրեաիրավական: Դատախազությունը փաստաբանների ներկայացրած հաղորդումներին հստակ տվել է գնահատական, որ սրա մեջ հանցակազմ չկա, վարույթներ չի նախաձեռնել: Ո՞րն եք համարում բռնություն, ո՞ր գնահատականը»,- այսօր առաջին ատյանի ընդհանուր իրավասության դատարանի Կենտրոն նստավայրում, դատավոր Ժորա Չիչոյանի նախագահությամբ նիստի ժամանակ, նման հարցադրումներ hնչեցրեց գործով մեղադրյալ՝ «Ազգային անվտանգություն» կուսակցության նախագահ Գառնիկ Իսագուլյանի պաշտպան Աննա Ծառուկյանը: Դատավոր Չիչոյանի նախագահությամբ այսօր քննվում էր սուտ մատնության, բռնության կոչեր անելու եւ մի քանի այլ դրվագներով նախաձեռնված քրեական վարույթը:
Իսագուլյանի պաշտպանը դատարանին միջնորդեց մեղադրանքի բովանդակության սահմանադրականությունը որոշելու համար դիմել Սահմանադրական դատարան: Մեղադրող կողմն առարկեց՝ պնդելով, որ մերժման ենթակա միջնորդություն է, քանի որ փաստաբանը չի հիմնավորել, չի բերել բավարար փաստարկներ՝ նորմի որոշակիության հետ կապված խնդիր ունենք: Դատարանը սակայն հայտնեց, որ միջնորդությանը կանդրադառնան ապացույցների հետազոտությունից հետո: Իսկ այսօր ապացույցների արձանագրությունների հետազոտման փուլը սկսվեց:
Նիստից հետո փաստաբան Ծառուկյանը լրագրողների հետ զրույցում ասաց. «Շատ կարեւոր էր, որ դատարանը գտավ, որ միջնորդությունը մերժման ենթակա չէ: Այսինքն՝ մի հատ փուլ է գալու, որտեղ լինելու են հարցեր, վերջնական ելույթով ավելի մեծ հիմնավորումներ, եւ դատարանն ուզի, թե չուզի, արդեն իսկ մեղադրանքը կա՛մ հաստատված համարելուց, կա՛մ արդարացման գնալուց, որոշելու է այդ հոդվածի սահմանադրականության հարցը»:
Կարդացեք նաև
Արփինե ՍԻՄՈՆՅԱՆ
