Դեկտեմբերի 10-ին Ազգային գրադարանում «Հայաստան ծրագրի» կազմակերպած «Արդյոք Հայաստանում ԶԼՄ-ների ինքնակարգավորումը լուծո՞ւմ է» խորագրով պանելային քննարկման ժամանակ Aravot.am-ի թղթակիցը հետաքրքրվեց՝ «Զանգվածային լրատվության մասին» օրենքում մեդիայի ինքնակարգավորմանն ուղղված փոփոխությունների ու լրացումների կատարման օրենքի նախագծի վերաբերյալ Վենետիկի հանձնաժողովի կարծիքը ստանալուց հետո ի՞նչ փոփոխությունների է ենթարկվել ապագա օրենքը։
Պանելիստներից Անդրանիկ Շիրինյանը, որը Freedom House-ի հայաստանյան ներկայացուցիչն է, պատասխանեց, որ նախագիծը փոփոխությունների է ենթարկվել, առանց մանրամասներ հայտնելու։
«Օրենքի նախագծում մեծ փոփոխություններ են տեղի ունեցել։ Սակայն, պետք է համբերատար լինել, քանի որ վերջին ամիսներին Արդարադատության նախարարությունը փոփոխությունների է ենթարկվել, փոխվել է նախարարը, աշխատակազմը», – հիշեցրեց Շիրինյանը։
Իր խոսքում իրավապաշտպան կազմակերպության ներկայացուցիչն ընդգծեց, որ ինքնակարգավորումը ընդամենը մեկ գործիք է ապատեղեկատվության դեմ պայքարում և այն չի կարող հիմնովին լուծել ապատեղեկատվության խնդիրը։
Կարդացեք նաև
Այս համատեքստում Հայաստանի մեդիայի զարգացման ծրագրի տնօրեն Կորինա Չեպոյը փորձեց պատասխանել քննարկման խորագրում հնչող հարցին՝ «արդյոք Հայաստանում ԶԼՄ-ների ինքնակարգավորումը լուծո՞ւմ է»։
«Մասամբ», – ասաց նա՝ հավելելով, որ ինքնակարգավորումը չի լուծի մեդիա ոլորտում առկա բոլոր խնդիրները։
Անդրադառնալով լրատվամիջոցների անկախության անհրաժեշտությանը՝ Անդրանիկ Շիրինյանը փաստեց, որ Հայաստանում զարգացած չէ անհատ ընթերցողների կողմից լրատվամիջոցներին նվիրատվություններ կատարելու մշակույթը։ Ըստ Շիրինյանի՝ ընթերցողների կողմից նվիրատվությունները կարող են նպաստել ԶԼՄ-ների անկախությանը։
Freedom House-ի ներկայացուցիչն իր խոսքը եզրափակեց շեշտելով՝ «Քանի որ իշխանությունները փոփոխվում են, և ոչ բոլոր իշխանություններն են նվիրված ժողովրդավարությանը, [ինքնակարգավորմանը վերաբերող] օրենքը պետք է լինի չափազանց ազատական»։
Հիշեցնենք․ ««Զանգվածային լրատվության մասին» օրենքում փոփոխություններ և լրացումներ կատարելու մասին» ՀՀ օրենքի վերաբերյալ Հայաստանի Հանրապետությունը կարծիք էր խնդրել Վենետիկի հանձնաժողովից։ Ողջունելով ինքնակարգավորման մեխանիզմների ստեղծման նախաձեռնությունը՝ Հանձնաժողովը հանդես էր եկել մի շարք դիտարկումներով և առաջարկություններով։
«Հայաստան ծրագիրը» շահույթ չհետապնդող հիմնադրամ է, որը ստեղծվել է «Հ. Հովնանյան ընտանեկան հիմնադրամի» աջակցությամբ և գործունեություն է ծավալում 2023 թվականից Հայաստանում։ Վերջինիս առաջնահերթություններից է մասնագիտական և կրթական միջոցների կիրառմամբ կառուցել հաղորդակցման արդյունավետ էկոհամակարգ երկրում և երկրից դուրս, ինչը հնարավորություն կտա արդյունավետ կերպով ներկայացնելու Հայաստանի ներուժն ու երկրում տեղի ունեցող իրադարձությունները միջազգային հանրությանը՝ բարձրացնելու երկրի մասին միջազգային իրազեկվածության մակարդակը։
Արսեն ԱՅՎԱԶՅԱՆ
