Վերջերս Ֆակտոր TV-ին տված հարցազրույցում ԱԺ ՔՊ խմբակցության պատգամավոր Թագուհի Ղազարյանն ասել էր, որ Բարձրագույն կրթության եւ գիտության մասին օրենքի նախագծով կառավարման մարմիններում արգելք է լինելու, եւ նրա խոսքով՝ քաղաքական պաշտոնյաներն ու կուսակցությունների ներկայացուցիչները չեն կարող լինել բուհերի կառավարման մարմիններում:
ՔՊ-ական պատգամավորը նաեւ ընդգծել էր, թե կա բուհերի հոգաբարձուների խորհուրդներն ամբողջությամբ ապակուսակցականացնելու եւ ապաքաղաքականացնելու քաղաքական որոշում, ոչ միայն ՔՊ-ականները, այլեւ այլ կուսակցականներ դուրս են բերվելու կառավարման խորհուրդներից:
Թեմայի վերաբերյալ Aravot.am-ը փորձել է մեկնաբանություններ ստանալ տարբեր բուհերից:
ԵՊՀ լրատվականից Քնար Միսակյանը հետեւյալ կերպ արձագանքեց. «Այս պահի դրությամբ ԵՊՀ հոգաբարձուների խորհրդի կազմում որեւէ փոփոխություն չկա, ըստ այդմ՝ մեկնաբանություն էլ չկա»:
Կարդացեք նաև
Հիշեցնենք, որ ԵՊՀ հոգաբարձուների խորհրդի նախագահը ՀՀ պաշտպանության նախարար Սուրեն Պապիկյանն է, եւ ի թիվս այլոց՝ խորհրդի կազմում են ԿԳՄՍ նախարարի տեղակալ Արթուր Մարտիրոսյանը, ՀՀ գլխավոր դատախազ Աննա Վարդապետյանը, Բարձր տեխնոլոգիական արդյունաբերության նախարար Մխիթար Հայրապետյանը, «Հայաստան» համահայկական հիմնադրամի գործադիր տնօրեն Հայկակ Արշամյանը:
Խ. Աբովյանի անվան մանկավարժական համալսարանի լրատվության եւ հանրության հետ կապերի կենտրոնի ղեկավար, ՀՊՄՀ հոգաբարձուների խորհրդի անդամ Դիանա Մարկոսյանը հետեւյալը փոխանցեց. «Մանկավարժական համալսարանի հոգաբարձուների խորհրդի անդամների ուղիղ կեսը, որը ներկայացնում է ԲՈՒՀ-ը, 100 տոկոսով անկուսակցական է։ Ինչ վերաբերում է մյուս կեսին, որոնց մի մասը ներկայացնում է ՀՀ կառավարությունը, մյուս կեսը` ՀՀ ԿԳՄՍ նախարարությունը, ապա երբեք անհրաժեշտություն չենք ունեցել խորամուխ լինելու նրանց կուսակցական պատկանելության հարցերում, որովհետև առիթ չի եղել. խորհուրդը երբեք, որևէ իշխանության օրոք ակտիվ քաղաքական կեցվածք չի դրսևորել և մշտապես իրականացրել է կանոնադրությունից բխող իր գործառույթները»:
Մանկավարժական համալսարանի հոգաբարձուների խորհրդի նախագահն անձամբ ԿԳՄՍ նախարար Ժաննա Անդրեասյանն է, իսկ Մանկավարժականի հոգաբարձուների խորհրդի կազմում են ԿԳՄՍ փոխնախարար Արաքսիա Սվաջյանը, Կրթության տեսչական մարմնի ղեկավար Վաղարշակ Մատիկյանը, վարչապետի աշխատակազմի սոցիալական հարցերի վարչության պետ Սերգեյ Թաշչյանը, ԿԳՄՍՆ բարձրագույն կրթության եւ գիտության կոմիտեի ծրագրերի իրականացման վարչության պետ Լուսինե Գրիգորյանը եւ այլք:
Ճարտարապետության եւ շինարարության Հայաստանի ազգային համալսարանից Aravot.am-ին փոխանցեցին, որ քաղաքական հարցադրումները չեն մեկնաբանում:
Այս համալսարանի հոգաբարձուների խորհրդի նախագահը Քաղաքաշինության կոմիտեի նախագահ Եղիազար Վարդանյանն է, ի թիվս այլոց՝ խորհրդի կազմում են հետեւյալ պաշտոնյաները՝ ԿԳՄՍ նախարարի տեղակալ Ալֆրեդ Քոչարյանը, Տարածքային կառավարման եւ ենթակառուցվածքների նախարարի տեղակալ Քրիստինե Ղալեչյանը, Կադաստրի կոմիտեի նախագահ Սուրեն Թովմասյանը, ԿԳՄՍՆ բարձրագույն կրթության եւ գիտության կոմիտեի նախագահի տեղակալ Հարություն Սարգսյանը:
Երեւանի կինոյի եւ թատրոնի ինստիտուտի լրատվության պատասխանատու Վովա Արզումանյանը Aravot.am-ին փոխանցեց, որ բուհի խորհրդի կազմում փոփոխություն չի եղել:
Այս բուհի խորհրդի կազմում են ԿԳՄՍ նախարարի խորհրդական Նաիրի Հարությունյանը, ԿԳՄՍՆ բարձրագույն և հետբուհական մասնագիտական կրթության վարչության՝ ուսանողների աջակցության բաժնի պետ Արսեն Հակոբյանը, նույն նախարարության իրավաբանական վարչության պետի տեղակալ Հակոբ Քնաջյանը եւ ժամանակակից արվեստի վարչության գլխավոր մասնագետ Էլինար Ավետիսյանը:
Հիշեցնենք, որ 2018 թ՝ դեռեւս ԿԳՄՍ նախարար եղած ժամանակ, ներկայումս վարչապետի աշխատակազմի ղեկավար Արայիկ Հարությունյանը հայտարարում էր, թե քաղաքականությունը բուհերում եւ դպրոցներում պետք է լինի զրո, սակայն հենց այս իշխանության օրոք բուհերի կառավարման մարմինները համալրվեցին ՔՊ-ականներով, իշխանության մերձավոր մարդկանցով, ինչը հակառակ համեմատական է բուհերի ակադեմիական ազատություններին:
Գոհար ՀԱԿՈԲՅԱՆ
