Ժամը 21․00-ին ավարտվեցին Գյումրիում երեք օր շարունակ տեղի ունեցած նախնական ընտրությունները՝ «փրայմերիզը»։ Այսօր ուշ ժամի հայտնի կդառնա հաղթած թեկնածուի անունը։
Թե 7 թեկնածուներից հիմնականում ո՞ւմ միջև էր ընտրապայքարը կամ ո՞վ կդառնա Գյումրու քաղաքապետի պաշտոնակատար, իհարկե, տարբեր սցենարներ քննարկվում են, սակայն սա այն դեպքն է, երբ հստակ կանխատեսել հնարավոր չէ՝ պայմանավորված այն հանգամանքով, որ այս քաղաքի բնակիչներից շատերը հարցազրույցների ժամանակ նշում են, որ թեկնածուների մեծ մասին չեն ճանաչում։
Միայն մի բան է ակնհայտ, որ թեկնածուներից որևէ մեկը մոտ 1000 ձայնով կդառնա քաղաքապետի պաշտոնակատար, մինչդեռ այս քաղաքը պաշտոնական տվյալներով 109 հազար 453 ընտրող ունի։
Ինչպես պարզաբանել էր ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանը, հաշվարկը տեղի կունենա Գյումրու ՔՊ -ի գրասենյակում՝ թեկնածուների ներկայությամբ, ուղիղ եթերով։
Կարդացեք նաև
Հիշեցնենք, որ ընտրապայքարն ընթանում էր ԱԺ պատգամավորներ Կարեն Սարուխանյանի, Դավիթ Առուշանյանի, Գյումրու նախկին փոխքաղաքապետ, Աննա Հակոբյանի ազգական Վահագն Մկրտչյանի, Գյումրու ավագանու անդամ Շավարշ Արամյանի, Միասնական սոցիալական ծառայության Գյումրու տարածքային կենտրոնի ղեկավար Սարիկ Մինասյանի, Շիրակի մարզպետարանի աշխատակցուհի, ՔՊ երիտասարդական թևի Շիրակի մարզի համակարգող Էմմա Բարսեղյանի և, ՀՀ Էկոնոմիկայի նախարարության ներդրումային քաղաքականության բաժնի ղեկավար Լևոն Անանյանի միջև։
Նունե ԱՐԵՎՇԱՏՅԱՆ
