«Տարիներ առաջ, երբ կազմակերպվում էր Սիրիայի դեմ այս արշավը, որը պլանավորվում էր Արեւմուտքի կողմից, բազմաթիվ երկրներ՝ Արեւմուտքի աջակցությամբ փորձում էին տապալել իշխանությունը Սիրիայում, չնայած դա հանդիպում էր եւ Ռուսաստանի, եւ Իրանի դիմադրությանը: Տարիներ շարունակ Թուրքիան Արեւմուտքի ձեռքին գործիք էր: Չնայած այն հարաբերություններին, որ Էրդողանն ուներ Ասադի ընտանիքի հետ, Թուրքիան հովանավորում էր ահաբեկչական խմբավորումներին, մասնավորաբար «Հայաթ Թահրիրին», որը թուրքամետ ուժ է հանդիսանում եւ որն էլ տապալեց Սիրիայում Ասադի իշխանությունը» ,- «Հայելի» ակումբում ասաց ԱԺ «Հայաստան» խմբակցության պատգամավոր Գառնիկ Դանիելյանը:
«Այդ ամենը պլանավորել եւ իրականացրել է Թուրքիան, մասնակցություն ունի նաեւ Իսրայելը: 10 օրվա ընթացքում Ասադի իշխանությունն ընկավ, որովհետեւ նա մնացել էր մենակ: Խոսակցություններ կային, թե Ասադը փորձել էր վերջին շրջանում պայմանավորվածություններ ձեռք բերել Արեւմուտքի հետ, իսկ Արեւմուտքը ինչ-ինչ խոստումներ էր տվել, սակայն, վերջում իր գործելաոճին համապատասխան գցել էր Ասադին: Նաեւ Իրանը, որ պատրաստակամություն էր հայտնել աջակցելու Ասադին, մեծ ջանասիրությամբ չէր աջակցում»,-հավելեց նա:
Գառնիկ Դանիելյանը համոզմունք հայտնեց, որ թե Արևմուտքը, եւ թե շահագրգիռ կողմերը, այդ թվում՝ Իսրայելն ու Իրանը Սիրայի ներկա իրավիճակի հետ չեն համակերպվելու, եւ այլ զարգացումներ են լինելու առաջիկայում:
«Ամենակարեւորը այստեղ Սիրիայում ապրող մեր հայրենակիցների ճակատագիրն է: Տարիներ շարունակ քրիստոնյաները, հատկապես հայերը բնակվել են Մերձավոր Արեւելքում, կարեւոր դերակատարություն են ունեցել, բայց այսօր հայտնվել են անելանելի վիճակում՝ Հայաստանի իշխանությունների թեթեւ ձեռքով: Այս իշխանությունները ձեռքները լվանում են Հայաստանից դուրս գտնվող բոլոր հայրենակիցների առումով, օրեր առաջ էլ այդ մասին Նիկոլ Փաշինյանն է հայտարարել: Մեր հայրենակիցները պետք է իմանան, որ այս իշխանությունների կողմից աջակցություն չեն ստանալու, եթե հայտնվեն նման իրավիճակում, ինչ իրավիճակում հայտնվեց Սիրիայի հայ համայնքը: Լավագույն դեպքում կարող են կոչեր հնչել: Իմիջիայլոց, անգամ այդ կոչերն էլ չկան հայկական կողմից»,-նշեց ԱԺ «Հայաստան» խմբակցության պատգամավորը:
Կարդացեք նաև
Գոհար ՀԱԿՈԲՅԱՆ
