«Այս տարվա համար մեր ակնկալիքը վեց տոկոս և մի քիչ ավելի պակաս տնտեսական աճն է, մյուս տարվա համար ակնկալում ենք 5 տոկոսի շրջանակներում՝ կախված սցենարից։ Մոտ ենք լինելու մեր պոտենցիալի աճին, որը 5 տոկոսին մոտ է։ Այսինքն՝ 2025-ին սոլիդ աճ ենք ունենալու»,- մամուլի ասուլիսի ժամանակ ասաց Կենտրոնական բանկի (ԿԲ) նախագահ Մարտին Գալստյանը։
Լրագրողների հարցերին ի պատասխան, թե քանի տոկոսի գնաճ կարելի է ակնկալել առաջիկայում, Մարտին Գալստյանը պատասխանեց․ «Մենք ունենք 5,8 տոկոս աճ, որը որոշակի աճ է, բայց մտահոգիչ չէ»։
Հարցին՝ ի՞նչ ազդեցություն կունենա գնաճի վրա տրանսպորտի ուղեվարձի թանկացումը, ԿԲ նախագահը պատասխանեց․ «Մեր հաշվարկներով՝ մենք ակնկալում ենք, որ առավելագույն ազդեցությունը, որը կարող է մյուս տարվա ընթացքում տեսնենք, մեր գնահատմամբ առավելագույնը մինչև 0,5 տոկոսն է»։
Մարտին Գալստյանը հայտնեց՝ դրամավարկային թիրախը, որը հունվարի 1-ից լինելու է 3 տոկոս, մյուս տարի հասնելու ենք այդ թիրախին։
Կարդացեք նաև
Անդրադառնալով գնաճի տեմպերի վրա արտաքին ազդեցություններին, ԿԲ նախագահն ասաց․ «Արտաքին հատվածից ՀՀ տնտեսության վրա ակնկալվում են թույլ գնաճային ազդեցություններ»։
Լրագրողի հարցին՝ ի՞նչ ազդեցություն կարող է ունենալ բենզինի գինը գնաճի վրա, Մարտին Գալստյանը պատասխանեց․ «Բենզինի գինը մեծ ազդեցություն չի ունենում։ Բենզինի գինը մի պահ իջավ, հետո նորից բարձրացավ, այնպես որ, չեմ կարծում՝ էական ազդեցություն ունենա գնաճի վրա։ Եթե 10-15 տարի առաջ բենզինի տեսակարար կշռին նայենք, ապա կտեսնենք, որ մեր սպառողական զամբյուղի մեջ այն էականորեն նվազել է»։
Տաթև ՀԱՐՈՒԹՅՈՒՆՅԱՆ
