«Այս տարվա մարդու իրավունքների վիճակը, մեղմ ասած, խնդրահարույց է»,-«Մարդու իրավունքների վիճակը Հայաստանում. 2024-ի մարտահրավերները» թեմայով «Մեդիա կենտրոնում» անցկացվող քննարկման ժամանակ ահազանգեց «Իրավունքների պաշտպանություն առանց սահմանների» ՀԿ ղեկավար Արաքս Մելքոնյանը՝ համեմատելով մարդու իրավունքների վիճակը ՀՀ-ում այսօր և օրինակ՝ հինգ տարի առաջ։
Նա, հիշեցնելով ոստիկանության կողմից հավաքների շրջանակներում քաղաքացիների նկատմամբ բռնությունների փաստերը, ասաց․ «Այս տարի մենք ականատես եղանք ոստիկանության կողմից հատուկ միջոցների գործադրմանը և դրա առնչությամբ ոչ արդյունավետ քննության։ Նախ` բարձր քաղաքական ղեկավարության կողմից կար անպատժելիություն և հավանություն այդ գործողությունների նկատմամբ, քանի որ այդ հավաքներն իշխանության դեմ էին, հետևաբար ոստիկանությունը գործում էր ուղիղ հրամաններով։ Իրավապահ համակարգի, քննչական մարմինների, դատական իշխանության, ոստիկանության կախվածությունը գործադիր մարմնից այս տարի ակնհայտորեն ապացուցվեց։ Արդեն հունիսի 12-ի դեպքերի համար պարզ էր, որ քննչական կոմիտեն չի քննելու այդ օրերին տեղի ունեցած խախտումները։
Լրջագույն հետընթաց է տեղեկատվության ազատության իրավունքի ապահովման շրջանակներում նույն հատուկ միջոցների գործադրման վերաբերյալ։ Նախաքննական գաղտնիքի քողի ներքո չհրապարակելը այն կարևոր տեղեկատվության, թե ինչ հատուկ միջոցներ են գործադրվել հունիսի 12-ին, լրջագույն հետընթաց է հենց տեղեկատվության ազատության համատեքստում։ Առհասարակ պետական մարմինների կողմից տեղեկատվության հասանելիության ապահովումն է խնդրահարույց, երբ տեղեկատվությունը պատշաճ ու ժամանակին չի տրամադրվում»։
Կարդացեք նաև
Տաթև ՀԱՐՈՒԹՅՈՒՆՅԱՆ
