2023 թվականին, երբ արցախցիները բռնի տեղահանվեցին Հայաստանի հանրապետություն, հոկտեմբեր ամսից ՀՀ իշխանությունները ապօրինի կերպով դադարեցին արցախցիներին ճանաչել ՀՀ քաղաքացիներ, ընդ որում՝ հանրային դժգոհություններից խուսափելու համար, որոշումը կայացվեց քողարկված ձեւով․ կարծում է արցախցի Նարե Սիմոնյանը։
Այսօր «Քաղաքական իրավունքների հայկական կենտրոնի» կազմակերպած «Քաղաքական իրավունքները եւ հետապնդումները Հայաստանում» թեմայով քննարկման ժամանակ նա անդրադարձավ ՆԳՆ այն պարզաբանմանը, որ արցախցիների անձնագրերը եղել են ճամփորդական փաստաթղթեր․ «ՀՀ-ն ունի ճամփորդական փաստաթուղթ եւ դա որեւէ առնչություն չունի արցախցիների անձնագրերի հետ։ Արցախցիների անձնագրերը ՀՀ անձնագրեր են եւ արցախցիները ունեն ՀՀ անձնագրեր, ունեն այն բոլոր իրավունքները եւ պարտականությունները, որոնք բնորոշ են ՀՀ քաղաքացիներին»։
Բանախոսը վկայակոչեց 1991 թվականի Գերագույն խորհրդի որոշումը, որը սահմանում է՝ ՀՀ օրենքները տարածվում են Արցախի հանրապետություն վրա։
Այս ամենում ամենակարեւոր հարցի՝ ընտրելու եւ ընտրվելու իրավունքի մասով էլ Նարե Սիմոնյանը հայտարարում է․ «Այո, արցախցիները ՀՀ-ում ընտրելու իրավունք ունեն»։
Կարդացեք նաև
Նա հայտարարեց, որ 2021 թվականի արտահերթ ընտրություններին արցախցիները դիմել են համապատասխան ոստիկանական բաժանմունքներ եւ իրավունք են ստացել մասնակցելու ՀՀ ընտրություններին։ 105 նման դեպք կա, որ դատարաններում՝ իրենց 070 կոդով անձնագրերով, մարդիկ ստացել են ընտրելու իրավունք, նման հայտերը մերժելու դեպքեր չեն գրանցվել։
Արցախցիների անձնագրերի եւ դրանով պայմանավորված քաոսը Նարե Սիմոնյանը համարում է ՀՀ իշխանության կողմից իրավունքների սահմանափակում՝ քաղաքական դրդապատճառներով, որը էլ ավելի մեծ քաոսի է հանգեցնելու։
Մանրամասները՝ տեսանյութում
Բանախոսը, ընդհանուր առմամբ, արցախցիների նկատմամբ խտրական դրսեւորումներ է արձանագրել՝ սկսած ԱԺ պատգամավոր Գագիկ Մելքոնյանի հայտարարությունից, որ արցախցիները թող իրենց հյուրի նման պահեն եւ քաղաքական գործընթացների չմասնակցեն , վերջացրած նրանով, որ քրեական տարբեր վարույթներ են հարուցվում՝ ցուցադրելով, թե ինչպես են արցախցիները քաղաքական իրադարձություններին մասնակցում։
Նելլի ԳՐԻԳՈՐՅԱՆ
