«Մարդու իրավունքների խախտումը ֆիքսում է դատական իշխանությունը։ Եթե դուք այդտեղ որեւէ հանցավոր էլեմենտ եք տեսնում՝ պետք է դիմեք իրավապահ մարմիններին։ Ես չեմ կարող գնահատական տալ։ Մոտեցեք Հովիկ Աղազարյանին, նա դեռ շարունակում է մնալ ԱԺ պատգամավոր, տվեք իրեն ձեր հարցերը»,- խորհրդարանում լրագրողների հետ զրույցում ասաց ԱԺ «Քաղաքացիական պայմանագիր» խմբակցության պատգամավոր Վլադիմիր Վարդանյանը։
Լրագրողներին հետաքրքրում էր, թե Նիկոլ Փաշինյանն իրավական ի՞նչ հիմքերով է Հովիկ Աղազարյանի հեռախոսային տվյալները կիսել ՔՊ վարչության անդամների հետ։ Վլադիմիր Վարդանյանը կոռեկտ չի համարում, որ ինքը գնահատականներ հնչեցնի այլ պատգամավորի հետ կապված հարցերով, կարծում է, որ Հովիկ Աղազարյանը պետք է իր գնահատականները տա։
«Ես պատասխանատու եմ իմ գործունեության, իմ քաղաքական թիմի համար, իսկ քաղաքական թիմի տեսանկյունից այդ հարցը Հովիկ Աղազարյանինն է, ինքը պետք է պատասխանի»,- ասաց նա՝ հրաժարվելով նմանատիպ կամ այլ հարցերի, բացի ԵԽԽՎ աշխատանքներին վերաբերող, պատասխանել։
Հիշեցնենք, դեկտեմբերի 3-ի երեկոյան ՔՊ վարչությունը նիստ գումարեց եւ որոշեց Հովիկ Աղազարյանին հեռացնել ՔՊ-ից։ «․․․Հովիկ Աղազարյանը հեռացվել է «Քաղաքացիական պայմանագիր» կուսակցությունից՝ պետական եւ կուսակցական նշանակության կոնֆիդենցիալ տեղեկատվության արտահոսքերի, ինչպես նաև հանրության բարոյական նորմերի կոպիտ խախտումների պատճառով»,- ասված է որոշման մեջ։ Հովիկ Աղազարյանն էլ դեկտեմբերի 4-ին հայտարարեց, որ իր հեռախոսից անձնական բնույթի տեղեկություններ են հայտնվել վարչապետի սեղանին։
Կարդացեք նաև
Նելլի ԳՐԻԳՈՐՅԱՆ
