Հարգելի հայրենակիցներ,
ՀՀ պահեստազորի զինծառայողների նախաձեռնությունը հետևողական լինելով զինծառայողների և նրանց հավասարեցված անձանց ոտնահարված սոցիալական, ըստ այդմ, աշխատանքային իրավունքների վերականգման հարցում, իրազեկման կարգով հայտնում է, որ տարիներ շարունակ գործատուներից շատերը վերջնահաշվարկ կատարելիս անտեսել են 07.08.2010 թ․-ից ուժի մեջ մտած «ՀՀ աշխատանքային օրենսգրքում փոփոխություններ և լրացումներ կատարելու մասին» թիվ ՀՕ-117-Ն օրենքով օրենսգրքի 158-րդ հոդվածում կատարված փոփոխությունները, մասնավորապես
մինչև 2010 թ․-ը գործող խմբագրությամբ ՀՀ աշխատանքային օրենսգրքի 158-րդ հոդվածի համաձայն՝ ամենամյա արձակուրդն օրացույցային օրերով հաշվարկվող ժամանակահատված էր, իսկ 07.08.2010 թ․-ից ուժի մեջ մտած «ՀՀ աշխատանքային օրենսգրքում փոփոխություններ և լրացումներ կատարելու մասին» թիվ ՀՕ-117-Ն օրենքով օրենսգրքի 158-րդ հոդվածում կատարվել է փոփոխություն, այն է՝ Օրենսգրքի 158-րդ հոդվածի 1-ին մասում` «օրացույցային» բառը փոխարինել «աշխատանքային» բառով, ընդ որում, ՀՀ աշխատանքի և սոցիալական հարցերի նախարարի 06.09.2010 թվականի 83-Ա/1 հրամանով հաստատված «ՀՀ աշխատանքային օրենսգրքում փոփոխություններ և լրացումներ կատարելու մասին» ՀՀ օրենքի նորմերի` մինչև դրա ուժի մեջ մտնելը ծագած աշխատանքային պայմանագրային հարաբերությունների վրա տարածման վերաբերյալ պաշտոնապես պարզաբանել է.
1. Մինչև 2010թ. օգոստոսի 7-ը կնքված աշխատանքային պայմանագրերը յուրաքանչյուր աշխատողի համար պետք է համապատասխանեցվեն «ՀՀ աշխատանքային օրենսգրքում փոփոխություններ և լրացումներ կատարելու մասին» ՀՀ ՀՕ-117-Ն օրենքով աշխատողի համար ավելի բարենպաստ պայմաններ սահմանող նորմերին։
2. Մինչև 2010թ. օգոստոսի 7-ը ծագած աշխատանքային պայմանագրային հարաբերությունների կարգավորման վրա «ՀՀ աշխատանքային օրենսգրքում փոփոխություններ և լրացումներ կատարելու մասին» ՀՀ ՀՕ-117-Ն օրենքով աշխատողի համար նվազ բարենպաստ պայմաններ սահմանող նորմերը չեն տարածվում։
Կարդացեք նաև
3. 2010թ. օգոստոսի 7-ից հետո աշխատանքային հարաբերությունների ծագումը և աշխատանքային պայմանագրի լուծումը պետք է համապատասխանի «ՀՀ աշխատանքային օրենսգրքում փոփոխություններ և լրացումներ կատարելու մասին» ՀՕ-117-Ն օրենքով սահմանված նորմերին։
Վերոնշյալից ելնելով ակնհայտ է, որ այդ խնդիրը վերաբերելի է նաև պետական այլ գերատեսչություններում, ինչպես նաև մասնավոր սեկտորում աշխատած աշխատակիցներին, որոնք աշխատանքից ազատվելուց, ինչպես նաև թոշակի անցնելուց վերջնահաշվարկի հաշվարկման շրջանակներում չեն ստացել իրենց օրենքով հասանելիք գումարը:
Այսուհետ իրազեկված լինելով վերոնշյալ աշխատանքային իրավախախտումների մասով՝ բոլոր շահառուները կարող են իրենց օրենքով հասանելիք գումարը ստանալու նպատակով դիմել իրենց նախկին աշխատանքային վայրեր, իսկ մերժում ստանալու դեպքում իրենց իրավունքները վերականգման հարցով կարող են դիմել նաև դատական պաշտպանությանը:
Հաշվի առնելով, որ իշխանությունը միայն երջանկություն չէ, այն էլ առաջնահերթ պարտավորություն, ուստի ՀՀ պահեստազորի զինծառայողների նախաձեռնությունը հորդորում է ՀՀ կառավարությանը՝ անհապաղ ձեռնարկել համապատասխան միջոցներ վերոնշյալ իրավախախտումների հետևանքով առաջացած պարտավորությունները կարգավորելու ուղղությամբ, կամ առաջնորդվել սույն հրապարակմանը կից ՖԲ էջում տեղադրված տեսանյութով:
Հ.Գ. ՀՀ պահեստազորի զինծառայողների նախաձեռնությունը համագործակցելով լավագույն փաստաբանական գրասենյակների փաստաբանների հետ` պատրաստակամ է հնարավորինս աջակցել մեզ դիմող քաղաքացիներին իրենց իրավունքները վերականգնման հարցում։
ՀՀ ՊԱՀԵՍՏԱԶՈՐԻ ԶԻՆԾԱՌԱՅՈՂՆԵՐԻ ՆԱԽԱՁԵՌՆՈՒԹՅՈՒՆ
