ՀՀ կրթության, գիտության, մշակույթի և սպորտի նախարար Ժաննա Անդրեասյանը Խաչատուր Աբովյանի անվան հայկական պետական մանկավարժական համալսարանում այսօր մասնակցել է հունգարական պատմության, մշակույթի և լեզվի կենտրոնի բացման արարողությանը, որն իրականացվել է Հունգարիայի Պիտեր Պազմանի անվան կաթոլիկ համալսարանի հետ ՀՊՄՀ համագործակցության շրջանակում:
Միջոցառմանը ներկա են եղել նաև ՀՊՄՀ ռեկտոր Սրբուհի Գևորգյանը, ՀՀ-ում Հունգարիայի արտակարգ և լիազոր դեսպան Աննա Մարիա Շիկոն, Հունգարիայում ՀՀ դեսպան Աշոտ Սմբատյանը, Հունգարիայի Պիտեր Պազմանի անվան կաթոլիկ համալսարանի պատվիրակությունը՝ պրոռեկտոր Վինցե Քրիստիանի և հայագիտական ամբիոնի վարիչ Բալինթ Կովաչի գլխավորությամբ, պրոֆեսորադասախոսական կազմի ներկայացուցիչներ, ուսանողներ:
ՀՊՄՀ-ում բացված կենտրոնը ղեկավարելու է Պիտեր Պազմանի անվան համալսարանի ասպիրանտ, հայագետ Դանիել Գազդիկը, որի նախաձեռնությամբ Մանկավարժական համալսարանի արդեն շուրջ 10 ուսանողներ սկսել են հունգարերեն ուսումնասիրել:
Ողջունելով ներկաներին՝ ԿԳՄՍ նախարար Ժաննա Անդրեասյանը շնորհավորել է կենտրոնի բացման առթիվ՝ ընդգծելով, որ այն ոչ թե նախորդում, այլ հաջորդում է բուն գործընթացին՝ հաշվի առնելով, որ արդեն առկա են կենտրոնի շահառու ուսանողներ:
Կարդացեք նաև
«Արդեն ունենք սկսված բովանդակային գործընթաց, որը, վստահ եմ, նպաստելու է երկու բուհերի միջև համագործակցության ամրապնդմանը, որը նաև իր նպաստն է բերելու Հայաստան-Հունգարիա հարաբերությունների խորացմանն ու զարգացմանը»,- ասել է Ժաննա Անդրեասյանը:
Բարձրագույն կրթության միջազգայնացման կարևորության համատեքստում Ժաննա Անդրեասյանը կարևորել է, որ ՀՀ բուհերը խորացնում են համագործակցությունն արտերկրի գործընկերների հետ:
«Համատեղ հրապարակումներն ու հետազոտությունները ցույց են տալիս՝ համագործակցությունը ձեռք է բերում բովանդակային նոր շերտեր, և դրանով իսկ նաև գիտական ու հետազոտական արդյունք է գրանցվում։ Վստահ եմ՝ հունգարական պատմության, մշակույթի և լեզվի կենտրոնի բացումը միայն մեծացնելու է այն օրակարգը, որով միասին աշխատելու ենք: Անկասկած, մեր ուսանողները բազմաթիվ լավ գաղափարներ են ունենալու, որոնք, իհարկե, աջակցություն են գտնելու թե՛ բուհերի, թե՛ նաև երկու պետությունների կողմից: Մեզ համար կարևոր է խրախուսել և խթանել երիտասարդներին իրենց առջև դրված նպատակների հետևից գնալու ճանապարհին: Պիտեր Պալզմանի համալսարանում գործող հայագիտական կենտրոնի միջոցով արդեն երկու կենտրոնների միջև կիրականացվեն համատեղ հետազոտություններ, կոնֆերանսներ և միջոցառումներ»,- ասել է Ժաննա Անդրեասյանը:
ՀՊՄՀ ռեկտոր Սրբուհի Գևորգյանի խոսքով՝ կենտրոնի բացումը շարունակությունն է Պիտեր Պազմանի անվան համալսարանի հետ դեռևս 2016 թ. մեկնարկած հաջող համագործակցության, որի շրջանակում Բուդապեշտի համալսարանում գործում է հայագիտական եզակի կենտրոն բակալավրիատի և մագիստրոսի կրթական ծրագրերով, որոնցում ներգրավված է շուրջ 40 ուսանող: Նա հույս է հայտնել՝ ՀՊՄՀ-ում հունգարական կենտրոնի բացումը կնպաստի ինչպես երկու երկրների միջև կրթական ու գիտական կապերի խորացմանը, այնպես էլ երկու ժողովուրդների միջև բարեկամությանը:
ՀՀ-ում Հունգարիայի արտակարգ և լիազոր դեսպան Աննա Մարիա Շիկոն, կարևորելով Հայաստանի և Հունգարիայի միջև հարաբերությունների խորացման ուղղությամբ կատարվող երկկողմ աշխատանքը, շեշտել է մասնավորապես կրթության և մշակույթի ոլորտներում իրականացվող համատեղ աշխատանքը:
Հունգարիայում ՀՀ դեսպան Աշոտ Սմբատյանը ևս ողջունել է ներկաներին և նշել՝ դիվանագիտական հարաբերությունների վերականգնումից հետո թեև քիչ ժամանակ է անցել, բայց իրականացվել են բազմաթիվ ծրագրեր, որոնք սնուցում են Հայաստան-Հունգարիա հարաբերությունները:
Միջոցառման շրջանակում նաև ներկայացվել է Պիտեր Պազմանի անվան համալսարանի հայագիտական ամբիոնի հունգար ասպիրանտների խմբագրմամբ հրատարակված հոդվածների ժողովածուն: Հոդվածները տպագրվել են հունգարերենով և ներկայացնում են հունգար և հայ պատմաբանների հոդվածները Հայաստանի պատմության և հայ ժողովրդի անցած ուղու տարբեր հիմնախնդիրների վերաբերյալ: Խմբագրական աշխատանքը կատարած ասպիրանտները փոխանակման ծրագրի շրջանակում մեկ կիսամյակ ուսանել են ՀՊՄՀ-ում:
ՀՀ ԿԳՄՍՆ ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ԵՎ ՏԵՂԵԿԱՏՎՈՒԹՅԱՆ ՎԱՐՉՈՒԹՅՈՒՆ
