«Համենայն դեպս, մենք ելնում ենք նրանից, որ ՀՀ-ն մեր դաշնակիցն է, և ՀՀ-ի նկատմամբ մեր պարտավորությունները պահպանվում են»,- Sputnik Արմենիա մուլտիմեդիոն մամուլի կենտրոնի միացմամբ՝ Մոսկվա-Մինսկ-Աստանա-Բիշքեկ-Երևան տեսակամրջի ձևաչափով մամուլի ասուլիսի ժամանակ, հայտարարեց Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Իմանգալի Տասմագամբետովը։
Հիշեցնենք՝ Հայաստանը չմասնակցեց նոյեմբերի 28-ին Աստանայում կայացած ՀԱՊԿ գագաթնաժողովին։
Հարցին՝ այն, որ ՀՀ-ն չի մասնակցում կազմակերպության աշխատանքներին, դա չի՞ ազդում ՀԱՊԿ գործունեության արդյունավետության վրա, Իմանգալի Տասմագամբետովը պատասխանեց․ «ՀՀ-ի և կառույցի միջև վերջին շրջանում ձևավորված ձևաչափն առաջին հերթին ՀՀ-ի ռազմաքաղաքական ղեկավարության որոշումն է։ Միևնույն ժամանակ ՀՀ-ի չմասնակցությունը ՀԱՊԿ քննարկումներին և ՀՀ-ի՝ չմասնակցելը այն բոլոր հարցերի քննարկումներին, որոնք տեղի են ունենում, մեր գործունեության արդյունավետության վրա չի ազդում։ ՀՀ-ն ցանկացած պահի կարող է վերադառնալ կազմակերպություն լայնամասշտաբ մասնակցության ձևաչափով։ Դրա հետ կապված որևէ առարկություն, խոչընդոտ կազմակերպության կողմից չկա։ Ուստի հույս ունենք, որ որոշ ժամանակ անց ՀՀ-ն կմասնակցի մեր կազմակերպության աշխատանքներին»։
Հիշեցնենք՝ ՀՀ վարչապետ Նիկոլ Փաշինյանը ՀԱՊԿ-ում ՀՀ-ի անդամակցության սառեցման մասին հայտարարել էր․ «ՀԱՊԿ-ում մեր անդամակցությունը սառեցրել ենք ոչ միայն այն պատճառով, որ ՀԱՊԿ-ը չի ապահովում ՀՀ-ի նկատմամբ իր ունեցած անվտանգային պարտավորությունները, այլև այն պատճառով, որ մեր կարծիքով՝ ՀԱՊԿ–ը ստեղծում է սպառնալիքներ ՀՀ անվտանգության, Հայաստանի հետագա գոյության, ինքնիշխանության և պետականության համար»։
Կարդացեք նաև
Տաթև ՀԱՐՈՒԹՅՈՒՆՅԱՆ
