«Ես այս 6 ու քանի տարվա մեջ երբեւէ չեմ դիմել համապատասխան բաժնին՝ պետական, գաղտնի փաստաթղթերին ծանոթանալու համար։ Դա արվում է գրավոր։ Եթե խոսքը վերաբերվում է խմբակցության նիստերից արտահոսքին, որտեղ մասնակցում են 60-70 պատգամավորներ, կառավարության անդամներ, ապա ․․․ կարող է պատահի լրագրողի հետ զրույցի ընթացքում, ես մի բան եմ ասել, որը կարելի չէր։ Ես չեմ հիշում այդպիսի դեպք, որ նպատակամղված, տրամադրված՝ այսօր այս եմ արել արտահոսք, վաղը՝ այն»,- խորհրդարանում լրագրողների հետ զրույցում ասաց ՔՊ-ից հեռացված Հովիկ Աղազարյանը։
«Վարչության որոշմամբ Հովիկ Աղազարյանը հեռացվել է «Քաղաքացիական պայմանագիր» կուսակցությունից՝ պետական եւ կուսակցական նշանակության կոնֆիդենցիալ տեղեկատվության արտահոսքերի, ինչպես նաև հանրության բարոյական նորմերի կոպիտ խախտումների պատճառով։»,- ասված էր երեկ վարչության նիստից հետո տարածված հայտարարության մեջ։ Այսօր էլ ՔՊ խմբակցության ղեկավար Հայկ Կոնջորյանը հայտարարեց՝ Հովիկ Աղազարյանը վարչության նիստում չի հերքել, որ պետական գաղտնիքի, ներկուսակցական քննարկումներից արտահոսք է թույլ տվել։
«Ո՞նց է եղել, որ իմ անձնական դաշտին վերաբերող նյութեր են հայտնվել վարչությունում, վարչապետի մոտ, որովհետեւ, երբ պարոն Քյարամյանի հետ կապված միջադեպի մասով իմ փաստաբանը հայց է ներկայացրել դատախազություն, որպեսզի պարզաբանումներ մտցվեն եւ այդ շրջանակներում տեղի է ունեցել հարցաքննություն իմ հետ, իմ հեռախոսն առգրավվել են: Ես ոչ թե դիմադրել եմ, այլ ասել եմ՝ վերցրեք, հանկարծ չգրեք առգրավվել։ Ասել եմ՝ խնդրեմ, Աղազարյանը տվեց։ Այդ հեռախոսը 10 օրից ավել գտնվել է քննիչի մոտ եւ քննիչն ասաց, որ իրենց հետաքրքրում են միայն ու միայն այն հեռախոսազանգերը, որոնք կապ ունեն պարոն Քյարամյանի հետ՝ այդ գործով։ Ասացի՝ խնդրեմ, բայց ես ասացի, որ այնտեղ լիքը բաներ ունեմ, որոնք չեմ ուզում, որ կարդաք։ Կարդաք՝ ջհանդամը, կարդացեք հիմա, տղա եք, սարսափելի բան չի, հանկարծ չհրապարակվի։ Ասաց՝ պարոն Աղազարյան, էս ինչեր եք ասում, դուք գիտե՞ք որ պետության մեջ եք։ Ես հպարտ կեցվածք ընդունեցի՝ համոզված լինելով, որ չէ․․․ բայց պարզվում է, որ իմ հեռախոսը բացել են, իմ հեռախոսից շատ նյութեր հայտնվել են վարչապետի մոտ․ ո՞վ է այդ նյութերը տվել, ի՞նչ նպատակով է տվել, ես չեմ կարող ասել»։
Հովիկ Աղազարյանը հայտարարեց՝ չէր ուզի հավատալ, որ դա արվել է Նիկոլ Փաշինյանի հրահանգով։
Կարդացեք նաև
Մանրամասները՝ տեսանյութում
Նելլի ԳՐԻԳՈՐՅԱՆ
