«Պարզվել է, որ Հովիկ Աղազարյանը խմբակցության նիստերից, այլ քննարկումներից, այդ թվում նաեւ պետական անվտանգությանը վերաբերող, որոնք որ ենթակա չէին հրապարակվելու, արտահոսքեր է կազմակերպել»,- խորհրդարանում լրագրողների հետ ճեպազրույցում ասաց «Քաղաքացիական պայմանագիր» խմբակցության ղեկավար Հայկ Կոնջորյանը՝ անդրադառնալով ՔՊ վարչության երեկ կայացրած որոշմանը՝ Հովիկ Աղազարյանին կուսակցությունից հեռացնելու մասին։
«Վարչության որոշմամբ՝ Հովիկ Աղազարյանը հեռացվել է «Քաղաքացիական պայմանագիր» կուսակցությունից՝ պետական եւ կուսակցական նշանակության կոնֆիդենցիալ տեղեկատվության արտահոսքերի, ինչպես նաև հանրության բարոյական նորմերի կոպիտ խախտումների պատճառով»,- ասված է երեկ տարածված որոշման մեջ։
Հայկ Կոնջորյանը հայտարարեց, որ Հովիկ Աղազարյանը նաեւ ներկուսակցական քննարկումներից է արտահոսքեր թույլ տվել, բայց օրինակներ չբերեց՝ ասելով, որ այդ տեղեկությունների մի մասը գաղտնագրված է, բայց դրանց մի մասը մամուլում կա։ Մնացյալ հարցերը, ըստ նրա, իրավապահների տիրույթում են եւ զբաղվում են։
Լրագրողների հարցերին ի պատասխան, Հայկ Կոնջորյանն ասաց՝ չի կարող ասել՝ գլխավոր դատախազը կգա՞ ԱԺ՝ Հովիկ Աղազարյանին մանդատից զրկելու հարցով, թե ոչ։ Հայկ Կոնջորյանը սակայն գնահատական տվեց․ «Ես առնվազն տեսնում եմ, որ քննելու բան կա, բայց ես իրավաբան չեմ»։
Կարդացեք նաև
Հայկ Կոնջորյանը նաեւ հայտարարեց, որ ՔՊ վարչության նիստում Հովիկ Աղազարյանը չի հերքել այն դրվագներով արտահոսքերը, որոնց մասին խոսվել է։
Խոսքը, ըստ Հայկ Կոնջորյանի, Հովիկ Աղազարյանի հարցազրույցներում հնչեցված տեղեկությունների մասին չէ։ Իսկ թե ինչո՞ւ Հովիկ Աղազարյանի դեմ գործընթացը չի իրականացվել մինչեւ Նիկոլ Փաշինյանի խնդրանքը մերժելը, Հայկ Կոնջորյանը պարզաբանեց, որ գործընթացը ավելի վաղ էր սկսվել, հրապարակային է դարձել այդ ժամանակ։
Լրագրողի հարց-դիտարկմանը՝ ինչո՞ւ նույն գործընթացը չսկսվեց ԱԺ նախագահ Ալեն Սիմոնյանի դեմ, որը թքել էր քաղաքացու երեսին, ինչո՞ւ ՔՊ-ն ԲԴԽ-ում առաջադրեց Ալեքսանդր Սիրունյանի թեկնածությունը, որը ևս հայտնի է վիրավորական եւ ոչ կոռեկտ գրառումներով՝ տարբեր քաղաքացիների, քաղաքական գործընթացների վերաբերյալ, Հայկ Կոնջորյանը պատասխանեց՝ հիշեցնելով, որ Ալեն Սիմոնյանը քանիցս ներողություն է խնդրել, իսկ Ալեքսանդր Սիրունյանի դեպքի հետ զուգահեռներն, ասաց բացարձակ համադրելի չեն։
Հայկ Կոնջորյանը հայտարարեց նաեւ՝ եթե Նիկոլ Փաշինյանն իրեն էլ խնդրեր, ինքը մանդատը կդներ ու այդտեղ որեւէ հակասություն կամ ճնշում ինքը չի տեսնում։
Նելլի ԳՐԻԳՈՐՅԱՆ
