«ՌԴ-ն եթե այսօր իր ողջ ներուժը դներ հայերիս օգտին, մեկ է՝ ինքն այսօրվա իր դրվածքով հակաքաղաքակրթական է»,-ՀՀ-ում ԵՄ պատվիրակության գրասենյակի դիմաց հայտարարեց ԱԻՄ առաջնորդ Պարույր Հայրիկյանը։
Ինչպես արդեն տեղեկացրել ենք, ՀՀ-ում ԵՄ պատվիրակության գրասենյակի դիմաց Ազգային-Ժողովրդավարական Բեւեռի կողմից ի համերաշխություն Վրաստանի պայքարող ժողովրդի հավաք կազմակերպվեց։ Հավաքի ընթացքում հրապարակվեց ԱԺԲ խորհրդի հայտարարության տեքստը, որով դատապարտվում է Վրաստանի իշխանությունների կողմից խաղաղ ցուցարարների և քաղաքական այլախոհների նկատմամբ ուժի անհամաչափ կիրառումը։ Փաստաթուղթը փոխանցվեց ԵՄ պատվիրակության ներկայացուցչին։
Հավաքի ընթացքում Պարույր Հայրիկյանը վստահեցրեց՝ Վրաստան ասելով հասկանում ենք քաղաքակրթորեն ճիշտ տրամադրված վրացիներին․ «Նույնիսկ պետական շահից վեր է քաղաքակրթությունը, որովհետև համամարդկային զարգացումներից դուրս՝ որքան էլ հաջողակ լինես, մեկ է դատապարտված ես: Եթե անգամ մեկ հոգու իրավունքներից զրկում ես, կրկին դատապարտված ես, եթե խոսքը հազարներին է վերաբերում, առավել ևս։ Մենք նաև հավատարիմ ենք մեր ազգային, պետական ավանդներին»։
Կարդացեք նաև
Նա նաև հորդորեց «չնույնացնել բռնապետ ծախուներին որևէ ազգի ժողովրդի հետ»․ «Ժողովուրդն այլ բան է։ Իրական Վրաստանն այսօր փողոցում է։ Վրաստանի՝ եվրոպական կողմնորոշումը մեզ դարձնում է Եվրոպայի հետ սահմանակից։ Ավելի կարևոր է այն, որ քաղաքակրթական ճիշտ ընտրություն է կատարվում»։
Տաթև ՀԱՐՈՒԹՅՈՒՆՅԱՆ
