ԱԺ «Հայաստան» խմբակցությունը դեմ կքվեարկի 2025 թվականի բյուջեի փոփոխված տարբերակին։ Այս մասին ԱԺ հերթական նստաշրջանում ասաց «Հայաստան» խմբակցության պատգամավոր Արթուր Խաչատրյանը։
«Այս փաստաթուղթը «Հայաստան» դաշինքը համարում է որեւէ խնդիր չլուծող, ձախողումները շարունակող, երկրի պետության, ինքնիշխանությանը, տարածքային ամբողջականությանը հարված հասցնող գործունեության ֆինանսավորում, ուստի ենթակա չէ կողմ քվեարկելուն»,- ասաց Արթուր Խաչատրյանը։
Նա իր ելույթում նշեց, որ կառավարությունը 10 տոկոսով կրճատել է տնտեսական աճի կանխատեսումը։ «Ավելի է պակաս լինելու, որովհետեւ հաշվարկներն ու պնդումները, որ մեր տնտեսական պոտենցիալը մեծացել է, սուտ են։ Տնտեսական աճը դանդաղում է, հարկային եկամուտներն ու կապիտալ ծախսերը թերակատարվում են, զբոսաշրջիկների թիվը նվազել է, դրամական փոխանցումները եւ զուտ ներհոսքը կրճատվում է, արտաքին առեւտուրը գալիք տարի մոտ 40 տոկոսով կրճատվելու է, դեֆիցիտը գերազանցելու է 600 մլրդ-ը, Հայաստանի պետական պարտքը հատելու է 6 տրիլիոն դրամի շեմը՝ ավելի քան 15 մլրդ դրամ։ Որպեսզի արդյունաբերության աճ նկարեն, կառավարությունը կախարդական փայտիկով Հայաստանում ոսկու արդյունաբերություն է զարգացնում։ Չկա որեւէ ոլորտ, որտեղ կառավարությունը ձախողած չլինի»,- հայտարարեց Արթուր Խաչատրյանը։
Նա նաեւ անդրադարձավ արտաքին ու անվտանգային քաղաքականությանը՝ նշելով, որ Ջերմուկում, Շորժայում, Սեւ լճում ադրբեջանցիները բույն են դրել, իսկ միջազգային հանրությունը անհասկանալի լռություն է պահում։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
