ՀՅԴ Արեւմտեան Ամերիկայի Կենտրոնական կոմիտէն մասնակցեց «Հայաստան» համահայկական հիմնադրամի տարեկան հեռուստամարաթոնին՝ այս տարի իր պատգամը փոխանցելով նրա անդամներից փաստաբան Արմէն Յովհաննիսեանի միջոցաւ:
Նոյեմբերի 28ին, «Քեզ Համար, Հայաստան» խորագրի ներքոյ տեղի ունեցաւ «Հայաստան» համահայկական հիմնադրամի 27-րդ հեռուստամարաթոնը, որի ընթացքում այս պահի դրութեամբ հաւաքագրուել է շուրջ 15,302,500 միլիոն ամերիկեան դոլար: Հարկ ենք համարում նշել, որ դրամահաւաք–միջոցառումները դեռ շարունակւում են, իսկ վերջնական արդիւնքները կ՛ամփոփուեն տարեվերջին:
Հիմնադրամը յատուկ շնորհակալութիւն է յայտնում Հայաստանի տարածքում գործող դրամատներին, որոնք իրենց մեծ աւանդը ներդրեցին համայն հայութեան համար կարեւոր այս դրամահաւաքին` ընդհանուր առմամբ հանգանակելով 280,000,000 ՀՀ դրամ («Արդշինբանկ», «Ամերիաբանկ», «Ֆասթբանկ», «Էւոկաբանկ», «Հայէկոնոմբանկ», «ԱԿԲԱ բանկ, «Իւնիբանկ», «ԱՄԻՕ բանկ», «Կոնվերսբանկ», «Ինեկոբանկ», ՎՏԲ, «Արմսվիս բանկ»): Հանգանակութիւնների համար շնորհակալութիւն ենք յայտնում նաեւ «ԱԿԲԱ բանկ»ի եւ հիմնադրամի համատեղ թողարկած «ԱԿԲԱ Վիզա Բարերար քարտ»ի քարտապաններին, Digitain կազմակերպութեանը, «Տիգրան Մեծ» հրատարակչութեանը, ԵՊՀ Հիմնադրամին, «Գառնի Ինվեստ ՈւՎԿ»ին, «Թել Սէլ»ի բաժանորդներին, «ԷԿԼՕՖ ՈւՎԿ»ին, «Երեւանի գարեջուր» ՓԲԸին, ինչպէս նաեւ բոլոր նուիրատուներին:
Նշենք, որ «Քեզ Համար, Հայաստան» հեռուստամարաթոն 2024-ի դրամական միջոցները կ՛ուղղուեն մի շարք ռազմավարական ծրագրերի իրականացմանը՝
– Սահմանային համայնքների խմելու եւ ոռոգման ջրի համակարգերի վերակառուցմանն ու կառուցմանը,
– Համայնքային բժշկական նոր կենտրոնի կառուցմանը,
– Սահմանային համայնքներում գտնուող դպրոցներում, մանկապարտէզներում, համայնքային կենտրոններում արեւային կայանների տեղադրմանը,
– Սահմանային համայնքների նիւթապէս անապահով ընտանիքների տներում արեւային ջրատաքացուցիչների տեղադրմանը,
– Բռնի տեղահանուած արցախցի կանանց գործարարութեան կարողութիւնների հզօրացմանը,
– Մշակութային եւ ստեղծարար նախաձեռնութիւնների աջակցութեանը։
Բացի վերոնշեալից, 2025-2026ին կ՛իրականացուեն «Հեռուստամարաթոն-2024»ին առաջադրուած երկու լայնամասշտաբ նախագծերը. դրանք են՝
1. Բնակելի աւանի կառուցում, հենաշարժողական խնդիրներ ունեցող պատերազմի վետերանների եւ նրանց ընտանիքների համար, Կոտայքի մարզի Բալահովիտ համայնքում՝ «Զինուորի տուն» բարեգործական ՀԿի հետ համատեղ:
2. Արցախի մշակութային ժառանգութեան կենտրոնի եւ արցախցի գորգագործների ընտանիքների համար բնակելի աւանի կառուցում Գիւմրիում:
Շնորհակալ ենք հիմնադրամի միջազգային ցանցին, բոլոր գործընկերներին եւ նուիրատուներին շարունակական աջակցութեան, անմնացորդ նուիրումի եւ հայրենիքի կողքին կանգնելու համար, ինչի շնորհիւ 2025-26-ին սահմանային բնակավայրերում ապրող տասնեակ հազարաւոր շահառուներ կ՛օգտուեն հիմնադրամի կողմից իրականացուող զարգացման ծրագրերից:
«Հեռուստամարաթոն 2024» դրամահաւաքի արդիւնքներն ըստ երկրների.
– Հայաստան՝ 1,218,185 դոլար
-Միացեալ Նահանգներ՝ 7,700,717
– Ֆրանսիա՝ 3,430,000
– Տորոնտօ (Կանադա)՝ 1,052,000
– Գերմանիա՝ 133,000
– Նիդերլանդներ՝ 50,000
– Արգենտինա եւ Բրազիլիա՝ 47,529
– Մեծ Բրիտանիա՝ 40,000
– Արգենտինա՝ 39,000 (յաւելեալ հանգանակութիւններ)
– Աւստրալիա՝ 20,000
– Ռումինիա՝ 1995
– Անանուն նուիրատուներ տարբեր երկրներից՝ 1,570,000։
«Ասպարեզ»
