«Եվրոպական հեռարձակողների միությունը խստորեն դատապարտում է Վրաստանում բողոքի ցույցերը լուսաբանող լրագրողների դեմ բռնությունն ու ֆիզիկական հարձակումները»։ Այս մասին ասված է Եվրոպական հեռարձակողների միության (EBU) տարածած հայտարարության մեջ։
«Տասնյակ լրագրողներ և մեդիաաշխատակիցներ ֆիզիկական հարձակման են ենթարկվել հատուկջոկատայիների կողմից, այդ թվում՝ Վրաստանի հանրային հեռուստաընկերության աշխատակից Դավիթ Բեջանիշվիլին, որը վիրավորվել է Թբիլիսիում ցույցի ժամանակ», – նշում է EBU-ն։
Միությունը խնդրահարույց է որակում նաև Հանրային հեռուստաընկերություն ուժով մուտք գործելու ցուցարարների փորձերը։
«Մամուլի անդամների նկատմամբ բռնության և ահաբեկման ցանկացած ակտ ամբողջապես անընդունելի է», – շեշտում են կազմակերպությունից։
Կարդացեք նաև
Եզրափակելով հայտարարությունը՝ Եվրոպական հեռարձակողների միությունը հիշեցնում է, որ մամուլի ազատությունը ժողովրդավարական հասարակության անկյունաքարն է և կոչ անում շահագրգիռ կողմերին պահպանել այս հիմնարար իրավունքը՝ թույլ տալով լրագրողներին շարունակական ցույցերի ֆոնին աշխատել ազատ և անվտանգ միջավայրում։
EBU-ն եվրոպական հանրային հեռարձակողների միավորում է, որին անդամակցում են 113 կազմակերպություն անդամ 56 երկրներից։ Վրաստանից EBU-ին անդամակցում է Վրաստանի հանրային հեռուստաընկերությունը, Հայաստանից՝ Հանրային հեռուստաընկերությունը և Հանրային ռադիոն։
Արսեն ԱՅՎԱԶՅԱՆ
