Այսօր Երևան քաղաքի ընդհանուր իրավասության քրեական դատարանի «Աջափնյակ-1» նստավայրում, դատավոր Արամայիս Ասատրյանի նախագահությամբ շարունակվեց «Հունիսի 12-ի» գործով դատավարությունը 16 մեղադրյալների նկատմամբ։ Դատարանն այսօր մերժեց պաշտպանական կողմի միջնորդությունը՝ «Սրբազան շարժման» ղեկավար Բագրատ արքեպիսկոպոս Գալստանյանին սույն գործով ճանաչել իբրեւ տուժող ու դատակոչել իբրեւ հավաքի կազմակերպիչ՝ հասկանալու համար արդյոք մեղադրյալների կատարած «խուլիգանության» կամ «զանգվածային անկարգության» արդյունքում խաթարվե՞լ են շարժման ծրագրերը, իսկ շարժման հեղինակությունը վնաս է կրել։
Մեղադրող դատախազն այսօր ներկայացրեց որոշ մեղադրյալների մասով մեղադրականները։ Պաշտպաններից Ռուբեն Մելիքյանը արձագանքեց՝ սա այն եզակի դատավարություններից է, որ պաշտպանները խոսելու են ոչ թե փաստական հանգամանքների մասին, այլ այն մասին, որ ներկայացված հանգամանքները հանցակազմ հանդիսանո՞ւմ են, թե՞ ոչ։ Պաշտպանական կողմի դիրքորոշումն այն է, որ այդ գործողությունները հանցակազմ չեն պարունակում, թեեւ մեղադրական կողմն ունի նաեւ որոշակի տեսագրություններ, որոնք հաստատում են կատարվածը․ «Սկսած նրանից, որ հասարակական կարգի օբյեկտիվ բացակայությունն է ակնհայտ, այդ գործողությունները հետեւանք չեն առաջացրել, օբյեկտիվ կողմի հատկանիշներն են բացակայում եւ այլն»։
Հիշեցնենք, այս գործով 15 մարդ մեղադրվում է «խուլիգանության» հոդվածով, մեկը՝ «զանգվածային անկարգության»։ Այս գործով որեւէ ոստիկանի մեղադրանք առաջադրված չէ․ հենց այս հանգամանքը, ըստ Ռուբեն Մելիքյանի, ցույց է տալիս գործի քաղաքական ենթատեքստը։
Նիստի մանրամասները՝ տեսանյութում
Կարդացեք նաև
Մինչ նիստը, գործով պաշտպան Ռուբեն Մելիքյանը գրառում էր կատարել, որը նաեւ դատարանում վերահաստատեց․ «Հետաքրքիր զուգադիպությամբ՝ այս դատական նիստն ընթանալու է «Թիֆլիսյան իրադարձություններին» զուգահեռ, որոնց շրջանակներում մեր հարգելի հարևաններն ամենայն մանրամասնությամբ ցույց են տալիս, թե ինչ է նշանակում իսկակա՛ն «զանգվածային անկարգությունն» ու իսկակա՛ն «խուլիգանությունը»։ Դե իսկ «Հունիսի 12-ի» գործով մեղադրյալներին դատում են ոստիկանների ուղղությամբ մի դատարկ շիշ կամ մի փեդի կտոր նետելու համար։ Ընդ որում, շատերը դա կատարել են այն ժամանակ, երբ ոստիկանական նռնակը պայթել է իրենց ոտքի տակ։
Սա՛ է «ծուռ հայելիների» իրականությունը»։
Նելլի ԳՐԻԳՈՐՅԱՆ
