Գյումրու փոխքաղաքապետ Սուրեն Ջանոյանը, որը 20 միլիոն դրամ գրավով տնային կալանքի է ենթարկվել Բալասանյան ընտանիքին պատկանող «Սև Բերդ» ամրոցի՝ օտարման չենթակա, Պաշտպանության նախարարության սեփականություն հանդիսացող մեկ հեկտար հողատարածքը 13 միլիոն դրամով գնելու ու հետագայում Սամվել Բալասանյանի կրտսեր որդուն՝ Խաչատուր Բալասանյանին վերավաճառելու մեղադրանքով, և որի պաշտոնական լիազորությունները ժամանակավորապես դադարեցված են, այսօր դարձավ 50 տարեկան։
Նրան շատերն են հիշել՝ ֆեյսբուքյան էջում շնորհավորանքներ հղելով, սակայն դրանք, բնականաբար, մնացել են անարձագանք, որովհետև տնային կալանքն արգելում է շփումներ ունենալ, հեռախոսից, համակարգչից օգտվել, մարդկանց հյուրընկալել։
Նշենք, որ ի տարբերություն Սուրեն Ջանոյանի, որի խափանման միջոցը մնացել է անփոփոխ, Սամվել Բալասանյանի կրտսեր որդու՝ Խաչատուր Բալասանյանի 70 միլիոն դրամ գրավով տնային կալանքը նոյեմբերի 15 Հակակոռուպցիոն վերաքննիչ քրեական դատարանի դատավոր Կարեն Ամիրյանի որոշմամբ փոխվեց, նրան տեղափոխեցին Արմավիր քրեակատարողական հիմնարկ:
Նրա փաստաբան Տիգրան Գրիգորյանը ֆեյսբուքյան գրառմամբ դատարանի այս որոշումն անհիմն էր համարել՝ նշելով․ «Դատավորն իր որոշմամբ շատ ավելի հեռուն է գնացել` պաշտպանյալիս զրկելով անգամ մերձավոր ազգականների հետ շփման իրավունքից` բացառությամբ կնոջ և զավակի, այն դեպքում, երբ նախաքննական մարմինն անգամ նման պահանջ ներկայացրած չի եղել»։
Կարդացեք նաև
Հիշեցնենք, որ «Սև Բերդ» պատմամշակութային ամրոցի պետական սեփականություն հանդիսացող, օտարման չենթակա հարակից հողատարածքները հանցավոր ճանապարհով սեփականաշնորհելու գործով անցնում են 5 մեղադրյալներ, որոնցից մեկն էլ Գյումրու նախկին քաղաքապետ Սամվել Բալասանյանն է, որն այս պահին գտնվում է ԱՄՆ-ում։
Նրան ՀՀ քննչական կոմիտեի Հատկապես կարևոր գործերի քննության գլխավոր վարչությունը մեղադրանք է ներկայացրել պաշտոնեական լիազորությունները չարաշահելու և երկու դրվագով խոշոր չափի փողերի լվացման համար, որդուն՝ երկու դրվագով խոշոր չափի փողերի լվացման համար։
Գյումրու ավագանու նախկին անդամ, Գյումրու ժուռնալիստների « Ասպարեզ» ակումբի նախագահ Լևոն Բարսեղյանը իր հարցազրույցներից մեկում ասել էր․ «Պաշտպանության նախարարությունը հողը ծախել է մասնավոր անձի, քաղաքապետարանի պաշտոնյաներին մեղադրանք եք ներկայացրել, գնացեք, մի հատ ՊՆ-ից մեղադրյալ չկա՞ այդտեղից ներգրավեիք, կասկածյալ չկա՞»։
Սուրեն Ջանոյանը իրեն առաջադրված մեղադրանքը չի ընդունում։
Նունե ԱՐԵՎՇԱՏՅԱՆ
