Սիրիայից հայերի զանգվածային արտահոսք դեռեւս չկա։ Այս մասին «Առավոտի» հետ զրույցում ասաց Լիբանանի «Ազդակ» թերթի գլխավոր խմբագիր Շահան Գանդահարյանը՝ անդրադառնալով Սիրիայում տեղի ունեցող իրադարձություններին։ «Պետք է սպասել, որպեսզի իրավիճակը հստականա, կայունանա, իրադարձությունները շատ արագ են տեղի ունենում»,- ասաց նա։
Նշենք, որ Թուրքիայից աջակցություն ստացող ահաբեկիչները երեկվանից ներթափանցել Սիրիայի տարբեր շրջաններ, այդ թվում՝ Հալեպ եւ վերահսկողություն են սահմանել Հալեպ քաղաքի մեծ մասի նկատմամբ։ Լրատվամիջոցներում հայտնվել են կադրեր, որոնք փաստում եմ Սիրիայում Թուրքիայի ակտիվ մասնակցության մասին։ Սիրիական բանակը դիմադրություն է ցույց տալիս ահաբեկչական ուժերին։
Շահան Գանդահարյանի խոսքով՝ իրավիճակը համեմատաբար հանգիստ է, մեծ թվով զոհեր չկան։ «Ընդհանուր համապատկերին օբյեկտիվ գնահատական տալու համար մի քիչ պետք է սպասել։ Այս զարգացումը շատ հանկարծակի էր, հազիվ Լիբանանում հրադադար էր տեղի ունեցել, անմիջապես այս դեպքերը ծավալվեցին Սիրիայում։ Ես կարծում եմ՝ Միջին արեւելյան տարածաշրջանի ընդհանուր խճանկարի տրամաբանությամբ պետք է ընկալել իրադարձությունները»,- նշեց նա։
Հիշեցնենք, որ նոյեմբերի 27-ին հրադադար է հաստատվել Լիբանանի «Հեզբոլլահ» ռազմաքաղաքական ուժի և Իսրայելի միջեւ։ Շահան Գանդահարյանի խոսքով՝ Լիբանանի դեպքում ՄԱԿ-ի 1701 բանաձեւի գործածությունն է։ Բայց ածանցյալ համաձայնություններ են ձեռք բերվել նաեւ որոշ կետերի շուրջ, առ այն, որ ԱՄՆ-ն եւ Ֆրանսիան վերահսկողական հանձնախմբի գործառույթներ պետք է իրականացնեն, լիբանանյան բանակը պետք է տեղակայվի երկրի հարավային հատվածում, ցամաքային սահմանազատում պետք է տեղի ունենա Լիբանանի եւ Իսրայելի միջեւ։
Կարդացեք նաև
Գանդահարյանի խոսքով՝ չի բացառվում, որ Սիրիայում տեղի ունեցող դեպքերը կապված են նաեւ Լիբանանի զարգացումների հետ։ «Պատերազմի էպիկենտրոնը նախապես Գազան էր, հետո դարձավ Լիբանանը։ Հիմա, երբ Լիբանանում հրադադար եղավ, սպասվում է, որ Գազայում էլ հրադադար կլինի։ Եվ հազիվ Լիբանանում հրադադար էր հայտարարված, սկսվեցին Սիրիայի դեպքերը։ Այսինքն՝ ընդհանուր գործողությունների փոխկապակցված շղթայի տեսությունն է աշխատում։ Բայց ավելի ճիշտ քաղաքական գնահատական տալու համար պետք է սպասել, թե ինչի կհանգի այս ամենը»,- ասաց նա։
Ռոզա ՀՈՎՀԱՆՆԻՍՅԱՆ
