Արզումանյան 10 հասցեում գտնվող 4-րդ կարգի վթարային շենքում հերթական փլուզումն է տեղի ունեցել։
«Արզումանյան 10 եւ 17 շենքերը գերակա շահ ճանաչվեցին 2023 թ. ապրիլի 13-ին: Դրանից հետո մենք մտածեցինք, որ գուցե մեր հարցերը արագ կկարգավորվեն, բնակիչներին կտարհանեն եւ կտանեն անվտանգ բնակարաններ` վարձակալական հիմունքներով, բայց գործընթացը չգիտեմ ինչ պատճառներով ձգձգվում է: Մենք կարծում էինք, որ գերակա շահ ճանաչվելը կարագացնի այս ամենը, սակայն մինչեւ հիմա դեռ ոչ մի բնակիչ չի տարհանվել: Մենք սպասում ենք այն մի քանի բնակիչներին, որոնք պետք է պայմանագրեր ստորագրեն»,-լրագրողների հետ զրույցում ասաց Արզումանյան 10 հասցեի բնակչուհի Զարուհի Առաքելյանը:
Նրա խոսքով՝ քաղաքապետարանն իրենց հետ պայմանագրեր է ստորագրել, վթարային շենքի բնակիչների 50 տոկոսն արդեն կնքել է այդ պայմանագրերը, համաձայն է, որ շենքը քանդվի, տեղում նորակառույց կառուցվի, 3 տարի անց վթարային շենքի բնակիչները տեղափոխվեն այնտեղ. «Սակայն մի քանի բնակիչ համաձայն չեն, պայմանագրեր չեն կնքում: Արդեն երկար տարիներ մենք պայքարում ենք մեր կյանքի, անվտանգության համար, աղետն էլ սպասեցնել չի տալիս, գալիս է՝ երբ իրեն է հարմար եւ ոչ թե սպասում բնակչի ստորագրությանը կամ դատական գործընթացներին»:
Բնակչուհին տեղեկացրեց, որ 3 հոգու գործերը ներկայումս գտնվում են դատարանում, իսկ դատական գործընթացները տեւական են. «Ըստ պայմանագրի՝ մինչեւ վերջին բնակիչը չստորագրի, բնակիչներին չեն կարող տարհանել այդ շենքից»:
Կարդացեք նաև
Զարուհի Առաքելյանը նշեց, որ փլուզումը սկսվում է առաջին մուտքից եւ առաջին մուտքում ակնառու վտանգում գտնվող բնակիչների համար պահանջում են աստիճանական տարհանում, ինչպես արվել է Արզումանյան 17 շենքի բնակիչների պարագայում. «Նրանք տեղափոխվել են վարձակալական հիմունքներով անվտանգ բնակավայրեր, թող նույնն էլ մեզ հետ անեն, մի՞թե հնարավոր չի մեզ էլ տեղափոխել, որ չմնանք փլատակների տակ»:
Գոհար ՀԱԿՈԲՅԱՆ
